خاتون کا شادی پر اصرار، دوست نے دیوار میں چُن دیا

انڈیا کی ریاست مہاراشٹر میں 30 برس کے ایک نوجوان نے اپنی دوست کو مبینہ طور پر اس لیے قتل کرکے اپنے فلیٹ کی دیوار میں چُن دیا کیونکہ وہ اس سے شادی کرنا چاہتی تھی۔

انڈین نیوز چینل این ڈی ٹی وی کے مطابق پولیس نے سنیچر کو کہا کہ ملزم نے اپنی 32 سالہ خاتون دوست کو شادی پر اصرار کرنے پر قتل کیا۔

ایک سرکاری بیان میں کہا گیا ہے کہ خاتون کو گذشتہ برس اکتوبر میں قتل کیا گیا تھا اور لاش کی باقیات ملزم کے فلیٹ سے چند روز پہلے برآمد کی گئیں۔

بیان میں کہا گیا ہے کہ ’ملزم اور مقتولہ کا ایک دوسرے کے ساتھ پانچ برس سے تعلق تھا۔ خاتون کو آخری مرتبہ 21 اکتوبر کو ملزم کے ساتھ دیکھا گیا۔‘

’جب مقتولہ کے خاندان والوں نے ملزم سے اس بارے میں پوچھا تو اس نے کہا کہ وہ گجرات گئی ہوئی ہیں۔‘

بیان میں لکھا ہے کہ اس کے بعد خاتوں کے گھر والوں نے پولیس سے رابطہ کیا اور پولیس نے اس شخص کو گرفتار کرکے لاش برآمد کی۔

پولیس نے ملزم کو گرفتار کرنے کے بعد اس کے خلاف انڈین پینل کوڈ  کی مختلف دفعات کے تحت قتل اور دیگر جرائم کرنے کا مقدمہ درج کر لیا ہے۔