گذشتہ 24 گھنٹے میں کورونا کے 353 نئے مریض سامنے آئے ہیں(فوٹو سبق)
سعودی عرب میں کورونا کے نئے کیسز گزشتہ چند دنوں سے مسلسل 300 سے زیادہ سامنے آرہے ہیں۔
سبق نیوز نے وزارت صحت کی جانب سے جاری بیان کے حوالے سے بتایا ہے کہ’ منگل کو گذشتہ 24 گھنٹے میں کورونا کے 353 نئے مریض سامنے آئے جبکہ 249 افراد وائرس سے صحت یاب بھی ہوئے ہیں۔‘
وزرات صحت کے مطابق ’گذشتہ 24 گھنٹے کے دوران کورونا کے مزید چار مریض چل بسے۔ جس کے بعد مرنے والوں کی تعداد 6 ہزار 410 ہو گئی ہے۔‘
وزارت صحت کا کہنا ہے کہ ’مملکت میں کورونا کے ایکٹیوکیسز کی تعداد دو ہزار 515 ہے، جن میں سے 427 کی حالت نازک ہے جو انتہائی نگہداشت کے یونٹس میں زیرعلاج ہیں۔‘
جاری اعداد وشمار کے مطابق سب سے زیادہ مریض ریاض ریجن میں سامنے آئے، جن کی تعداد 168 ہے جبکہ الشرقیہ ریجن میں 66 افراد میں وائرس کی تصدیق ہوئی ہے۔
مکہ ریجن میں کورونا کے 38 مریض سامنے آئے جبکہ الباحہ ریجن میں مریضوں کی تعداد 23 رہی۔ مدینہ منورہ ریجن میں 14 افراد میں کورونا وائرس کی تصدیق ہوئی ہے۔
القصیم ریجن میں بارہ، الجوف ریجن میں سات، نجران اور عسیر ریجن میں چھ ، چھ ،ا لحدود الشمالیہ ریجن میں چار، جازان، حائل اور تبوک ریجن میں تین ، تین مریض سامنے آئے ہیں۔
تین لاکھ 70 ہزار 987 افراد میں کورونا وائرس کی تصدیق ہو چکی ہے(فوٹو ایس پی اے)
اب تک تین لاکھ 70 ہزار 987 افراد میں کورونا وائرس کی تصدیق ہو چکی ہے جن میں سے تین لاکھ 62 ہزار 62 افراد شفایاب بھی ہوئے ہیں۔
وزارت صحت کا کہنا ہے کہ کورونا سے بچاؤ کے لیے مقررہ احتیاطی تدابیر پر عمل کرنا ضروری ہے، جن میں سماجی فاصلے کا اصول انتہائی اہم ہے۔
