سعودی، برازیلی فنکاروں کی ریاض میں ’ التقاء‘ سٹیج پر مشترکہ پرفارمنس

سعودی عرب اور برازیل کے فنکاروں نے ریاض میں مشترکہ طور پر ’التقاء‘ کے نام سے سٹیج سجایا اور شاندار پرفارمنس سے حاضرین کے دل موہ لینے میں کامیاب ہو گئے۔

عرب نیوز کے مطابق سعودی وزیر ثقافت شہزادہ بدر بن عبداللہ بن فرحان کی سرپرستی میں رائل انسٹی ٹیوٹ آف ٹریڈیشنل آرٹس (ورث) کے زیراہتمام منعقدہ اس تقریب میں سعودی اور برازیلی روایتی فنون پیش کئے گئے۔

کنگ فہد کلچرل سینٹر میں منعقد ہونے والی اس رنگا رنگ تقریب میں سعودی اور برازیلی ثقافت اور ورثے کے امتزاج کو شاندار انداز میں پیش کیا گیا۔

تقریب میں موجود  وزیٹر عبدالعزیز الانصاری نے بتایا ’ سعودی عرب اور برازیل کی مشترکہ ثقافت کو دیکھنا چاہتا تھا جو  واقعی حیرت انگیز انداز میں پیش کی گئی میں نے ایک فیصد بھی نہیں سوچا تھا کہ  تقریب اتنی شاندار ہوگی۔

تقریب میں دونوں ممالک کے مابین ہم آہنگی کو نمایاں کیا گیاجس میں سعودی اور برازیلی فنون کو یکجا کر کے پانچ روایتی پرفارمنسز اور ایک مشترکہ رقص پیش کیا گیا۔

تقریب میں موجود سوشل میڈیا انفلوئنسر اسماء السیاری نے اس مشترکہ پرفارمنس کو’جادوئی‘ قرار دیتے ہوئے کہا ’ سب سے زیادہ پسندیدہ پروگرام 100 فیصد سعودی ثقافت اور 100 فیصد برازیلی ثقافت پر مبنی تھا جو کہ نہایت خوبصورتی کے ساتھ یکجا کیا گیا۔

کنگ فہد ثقافتی مرکز میں پیش کئے جانے والے ایک پروگرام میں ایک سعودی اور ایک برازیلی آرٹسٹ کی مشترکہ پیش کش کو ’ہم آہنگی‘ کا نام دیا گیا جو شاندار انداز میں پیش کی گئی۔

مختلف قسم کی 15 ثقافتی سرگرمیوں میں فن پاروں کی نمائش اور ورکشاپس کا بھی اہتمام کیا گیا جس کا مقصد دونوں ممالک کے بصری فنون متعارف کروا کر فنکاروں کو ایک دوسرے کے قریب لانا تھا۔

یہاں موجود سعودی ماڈل اور وزیٹر سمر عبداللہ نے اپنے خیالات کا اظہار کرتے ہوئے کہا ’ یہ ناقابل یقین تھا جس پر میں سعودی عرب اور برازیلی آرٹسٹ کی ستائش کرتی ہوں۔

التقاء ان کئی اقدامات میں سے ایک ہے جن کا مقصد مملکت اور دیگر ممالک کے درمیان ثقافتی ورثے کو فروغ دینا اور روایتی فنون کو مقامی و بین الاقوامی سطح پر جوڑنا ہے۔

کنگ فہد کلچرل کمپلیس میں پیش کی جانے والی اس ثقافتی تقریب کا مقصد سعودی وژن 2030 کے تحت ثقافتی ورثے کے تحفظ اور ترقی کے ذریعے مملکت کے روایتی فنون کو فروغ دینا ہے۔