’پی ٹی آئی امیدوار 20 پولنگ سٹیشنز پر ری پولنگ کی درخواست دیں‘

وزیر اعظم عمران خان نے کہا ہے وہ این اے 75 ڈسکہ کے حلقے میں پی ٹی آئی کے امیدوار سے کہیں گے کہ وہ ان 20 پولنگ سٹیشنوں جن پر اپوزیشن شور مچا رہی ہے دوبارہ پولنگ کے لیے درخواست دیں۔

سوشل میڈیا سائٹ ٹوئٹر پر وزیر اعظم نے لکھا کہ انہوں نے ہمیشہ صاف اور شفاف الیکشن کے لیے جدوجہد کی ہے اس لیے اگرچہ الیکشن کمیشن کی جانب سے نتائج کے اعلان سے پہلے کسی قانونی مجبوری نہ ہونے کے باوجود پی ٹی آئی امیدوار سے کہیں گے کہ وہ 20 پولنگ سٹیشن پر دوبارہ پولنگ کی درخواست دیں۔   

وزیر اعظم نے کہا کہ ’ہم یہ اس لیے کر رہے ہیں کہ ہم شفافیت چاہتے ہیں اور سینیٹ الیکشن میں بھی اوپن بیلٹنگ چاہتے ہیں۔‘

عمران خان نے مزید کہا ’ہم ہمیشہ آزاد اور شفاف الیکشن کے عمل کو مضبوط کرنے کی کوشش کریں گے۔ تاہم دوسروں میں ایسی کمٹمنٹ کی کمی ہے۔‘

وزیراعظم نے کہا جب 2013 کے انتخاب کے بعد ہم نے چار حلقوں کو کھولنے کا مطالبہ کیا، تو اس کو پورا ہونے میں دو سال لگ گئے۔ 

خیال رہے گزشتہ جمعے کو ڈسکہ میں قومی اسمبلی کے حلقہ این اے 75  میں ہونے والے ضمنی انتخاب کے نتائج روک دیا تھا۔

الیکشن کمیشن نے کہا تھا کہ 20 پولنگ سٹیشنز پر نتائج میں ردوبدل کا شبہ ہے لہذا مکمل انکوائری کے بغیر حلقے کا نتیجہ جاری کرنا ممکن نہیں۔

سنیچر کو الیکشن کمیشن نے جاری کیے اعلامیے میں کہا تھا کہ حلقہ این اے 75 کے نتائج غیر ضروری تاخیر کے ساتھ موصول ہوئے، اس دوران متعدد بار پریذائیڈنگ افسران کے ساتھ رابطہ کرنے کی بھی کوشش کی گئی مگر ناکامی ہوئی۔

بیان کے مطابق ڈسٹرکٹ ریٹرننگ آفیسر اور ریٹرننگ افسر کی اطلاع پر چیف الیکشن کمشنر نے پنجاب پولیس کے سربراہ، کمشنر اور ڈپٹی کمشنر کے ساتھ رابطہ کرنے کی کوشش کی تاکہ متعلقہ پریذائیڈنگ آفیسرز کا پتا لگایا جا سکے مگر کوئی جواب نہ ملا۔