حوثیوں کی ریاض کو نشانہ بنانے کی کوشش، بیلسٹک میزائل تباہ

عرب اتحاد نے سعودی دارلحکومت ریاض کو بیلسٹک میزائل سے نشانہ بنانے کی کوشش ناکام بنائی ہے۔ خمیس مشیط، جازان اور جنوبی ریجن میں بھیجے جانے والے چھ  ڈرونز حملے بھی ناکام بنائے گئے۔

 ایران کے حمایت یافتہ حوثی باغیوں کی جانب سے داغے گئے بیلسٹک میزائل کو راستے میں روک کر تباہ کردیا گیا۔

ویب نیوز سبق اور ایس پی اے کے مطابق ایران نواز حوثی باغیوں کی جانب سے سنیچرکی رات  یمن سے بیلسٹک میزائل داغا گیا جس کا ہدف ریاض تھا تاہم اتحادی فورسز کی ایئر کمان اینڈ کنٹرول نے راڈار پر میزائل کی نشاندہی ہوتے ہی اسے فضا میں تباہ کردیا۔ 

اطلاعات کے مطابق فضا میں میزائل کو تباہ کیے جانے سے ہونے والا دھماکہ اہل ریاض نے بھی سنا۔ 

حوثی ملیشیا نے خمیس مشیط شہر کی طرف چار ڈرونز، جازان کی شہری آبادی اور جنوبی ریجن کو نشانہ بنانے کے لیے ایک، ایک ڈرون روانہ کیا تھا جنہیں فضا ہی میں ناکارہ بنا دیا گیا۔

یاد رہے کہ اس سے قبل سعودی فضائیہ نے حوثیوں کی جانب سے خمیس مشیط  کو نشانہ بنانے کی ایک کوشش کو ناکام بنایا تھا۔

عرب نیوز کے مطابق عرب اتحاد کے ترجمان نے کہا کہ ’حوثیوں کی جانب سے بھیجے جانے والے بوبی ٹریپ ڈرونز کی مسلسل نگرانی کی جا رہی ہے‘۔

’حوثی باغی شہریوں اور شہری اہداف کو نشانہ بنانے کی کوشش کررہے ہیں جو جنگی جرائم کے مترادف ہے‘۔

عرب اتحاد نے بین الاقوامی انسانی قانون کے مطابق شہریوں کے تحفظ کے لیے ضروری آپریشنل اقدامات کیے ہیں۔

ا سے قبل حوثی ملیشیا نے جمعے کو ایک دن میں تین حملے کرنے کی کوشش کی جسے ناکام بنایا گیا۔ 

عرب اتحاد نے ایک بیلسٹک میزائل اور دو ڈرونز راستے میں روک کر تباہ کردیے تھے۔