مکہ مکرمہ میں چاقو سے وار کرکے بیوی کو مارنے والا بنگلہ دیشی گرفتار

مکہ ریجن کی پولیس ایک خوفناک واقعے کی تفتیش کررہی ہے جس میں ایک غیرملکی نے بیوی اور دوسری خاتون کو ہلاک اور متعدد کو زخمی کردیا۔

سبق نیوز کے مطابق سیکیورٹی فورس کا کہنا ہے کہ گرفتار ہونے والا شخص بنگلہ دیشی ہے اور اس نے بیوی کو چاقو سے وار کرکے اور تیزاب ڈال کر ہلاک کیا ہے۔

تفصیلات کے مطابق بنگلہ دیشی باشندے نے بیوی پر چاقو سے اس وقت حملہ کیا جب وہ آپریشن اینڈ مینٹیننس کمپنی کی بس سے اتر رہی تھی۔ یہ واقعہ دونوں کے درمیان جھگڑے کے بعد پیش آیا۔

سیکیورٹی فورس کا کہنا ہے کہ اس حملے کے نتیجے میں بیوی اور ایک دوسری خاتون کی موت ہوگئی جبکہ متعدد  خواتین زخمی ہوئیں۔

سیکیورٹی فورس کے مطابق بنگلہ دیشی نے خود کو گرفتاری سے بچانے کے لیے تیزاب ڈال  کر خودکشی کی کوشش کی لیکن فورس نے اس کی کوشش ناکام بنادی اور اسے گرفتار کرلیا۔ اس کے خلاف قانونی کارروائی کی جارہی ہے۔