طلبہ کا کیمبرج امتحان منسوخ کرنے کا مطالبہ، ’آدھا کورس بھی مکمل نہیں‘

پاکستان میں کورونا وائرس کی تیسری لہر سامنے آنے کے بعد بیشتر تعلیمی اداروں کو ایک بار پھر بند کر دیا گیا ہے۔

گزشتہ ایک سال سے تعلیمی اداروں کو مکمل طور پر بحال نہیں کیا جاسکا جس کے باعث کبھی آن لائن امتحانات لیے گئے تو کبھی طلبہ کو گزشتہ نتائج پر پروموٹ کر دیا گیا تاہم اس بار وفاقی وزیر تعلیم شفقت محمود اعلان کر چکے ہیں کہ بغیر امتحان لیے طلبہ کو پروموٹ نہیں کیا جائے گا۔ 

تعلیمی اداروں پر ایک بار پھر پابندیاں عائد کرنے کے بعد پاکستان میں طلبہ  کیمبرج امتحان منسوخ کرنے کا مطالبہ کر رہے ہیں۔

طلبہ کا موقف ہے کہ کورونا وائرس کے باعث تعلیمی ادارے مکمل طور پر بحال نہیں ہوسکے جس کی وجہ سے کورس کا آدھا حصہ بھی مکمل نہیں ہوا۔ 

لاہور کے کوئین میری کالج کی طالبہ عائشہ رزاق نے اردو نیوز کو بتایا کہ ’تعلیمی ادارے بند ہونے کے باعث آدھا کورس بھی مکمل نہیں ہوا جبکہ آن لائن کلاسز میں بھی بہت سے مسائل کا سامنا کرنا پڑتا ہے۔‘ 

انہوں نے مطالبہ کیا کہ جس طرح گزشتہ سال گریڈ پریڈکشن کے تحت نتائج کا اعلان کیا تھا رواں برس بھی سکولز کیمبرج انٹرنیشنل کو طلبہ کا اسسمنٹ ریکارڈ بھیج کر نتائج کا اعلان کرے کیونکہ اس سال بھی طلبہ کو کورس مکمل کرنے کا وقت نہیں ملا۔ 

پاکستان میں کیمبرج انٹرنیشنل امتحانات کو منسوخ کرنے کے حوالے سے طلبہ نے پیر کو لاہور پریس کلب کے سامنے احتجاج کا بھی اعلان کیا ہے۔ 

کیمبرج امتحانات کو منسوخ کرنے کا مطالبہ اس وقت ٹوئٹر پر بھی ٹاپ ٹرینڈ کر رہا ہے۔ 

ثنا کریم نامی صارف نے وفاقی وزیر تعلیم شفقت محمود کو ٹیگ کرتے ہوئے لکھا ’دس ممالک امتحانات کو منسوخ کر چکے ہیں تو ہم کس بات کا انتظار کر رہے ہیں؟‘ 

دعا یوسفی لکھتی ہیں کہ ‘مجھے سمجھ نہیں آتی کہ ہمیں امتحان کیوں دینا پڑ رہے ہیں باوجود اس کے کہ کورونا وائرس سے سب سے زیادہ متاثر ہمارا بیچ ہوا ہے، ہمیں انصاف چاہیے۔‘ 

جنید سلیم نامی صارف نے لکھتے ہیں ’امتحان لے کر کورونا وائرس پھیلانے سے بہتر ہے کہ طلبہ کو پروموٹ کر دیا جائے، حکومت کو ایسی صورتحال میں غیر معمولی اقدامات کرنے کی ضرورت ہے۔‘ 

کورونا وائرس کے باعث طلبہ نے کچھ عرصہ قبل بھی تعلیمی اداروں میں امتحان دینے کے خلاف احتجاج کیا تھا۔