غیر ملکی کو ملازمت سے نکالنے پر کمپنی کو 15 لاکھ ریال ادا کرنے کا حکم
عدالت نے غیرملکی اور اس کے اہلخانہ کو واپسی کے ٹکٹ بھی دلوائے- (فوٹو اخبار 24)
سعودی عرب میں تبوک کی عدالت نے غیر قانونی طریقے سے ملازمت کا معاہدہ ختم کرنے پر نجی کمپنی کو ایک غیرملکی کو 1.5 ملین ریال ادا کرنے کا حکم دیا ہے۔
اخبار 24 کے مطابق تبوک کی لیبر کورٹ نے پرائیویٹ کمپنی کے خلاف فیصلہ جاری کرتے ہوئے کہا کہ’ مقیم غیرملکی کا یہ دعوی سچ ثابت ہوگیا کہ اس کی ملازمت کا معاہدہ غیرقانونی طریقے سے ختم کیا گیا‘۔
’عدالت کمپنی کو حکم دیتی ہے کہ وہ معاہدہ ختم کرنے پر بطور ہرجانہ غیرملکی کو 3 لاکھ 58 ہزار ریال ادا کرے-‘
لیبر کورٹ نے اپنے فیصلے میں کمپنی کو یہ حکم بھی دیا کہ ’وہ غیرملکی ملازم کو 85 ہزار ریال سالانہ ترغیبات، 36 ہزار ریال ٹرانسپورٹ الاؤنس، 85 ہزار ریال سالانہ الاؤنسز، 9 لاکھ 88 ہزار ریال اینڈ آف سروس اور 20 ہزار ریال سالانہ چھٹیوں کے معاوضے کے طور پر ادا کرے‘۔
لیبر کورٹ نے کمپنی کو ایک حکم یہ بھی دیا ہے کہ’ وہ اردنی شہری اور اس کے اہل خانہ کو اکانومی کلاس کے ٹکٹ اور کمپنی میں ملازمت سے متعلق سروس سرٹیفکیٹ بھی حوالے کرے‘۔
واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں
