حوثیوں کا جازان کے سرحدی علاقے پر حملہ، پانچ گولے داغے

سعودی عرب میں محکمہ شہری دفاع نے کہا ہے کہ ایران کے حمایت یافتہ حوثیوں نے یمن سے جازان کے ایک سرحدی قریے پر گولے داغے ہیں تاہم کوئی زخمی نہیں ہوا۔ 

سرکاری خبر رساں ایجنسی ایس پی اے کے مطابق محکمہ شہری دفاع جازان کے نائب ترجمان مھند زیلعی نے بدھ کو بیان میں کہا کہ ’ایران کے حمایت یافتہ حوثی دہشتگردوں نے یمنی علاقوں سے جازان کے ایک سرحدی قریے پر کئی گولے داغے‘۔

بیان میں کہا گیا کہ ’جائے وقوعہ کے معائنے سے پتہ چلا کہ قریے کی شاہراہ کے قریب پانچ پروجیکٹائل پڑے ہیں۔ شہری دفاع کے اہلکاروں نے اس حوالے سے ضروری اقدامات کرلیے‘۔ 

یاد رہے کہ گزشتہ جمعرات کو عرب اتحاد برائے یمن نے بتایا تھا کہ حوثیوں نے جازان پر بارود بردار ڈرون سے حملے کی کوشش کی تھی جسے ہدف تک پہنچنے سے قبل ہی روک کر تباہ کردیا گیا تھا۔

اس سے ایک ہفتے قبل حوثیوں  نے سعودی عرب پر 8 ڈرون اور تین بیلسٹک میزائل حملے کیے تھے اور یہ حملے بھی ناکام بنادیے گئے۔