’ڈرمز کے بادشاہ‘ فرہاد ہمایوں کا انتقال، ’وہ میوزیکل ہیرو تھے‘

مشہور پاکستانی بینڈ اوورلوڈ کے بانی اور ڈرمر فرہاد ہمایوں منگل کی صبح انتقال کر گئے ہیں۔ سنہ 2018 میں فرہاد ہمایوں نے اپنی ایک فیس بک پوسٹ کے ذریعے بتایا تھا کہ انہیں برین ٹیومر ہے اور انہوں نے سرجری بھی کرائی تھی۔

فرہاد ہمایوں کے انتقال کا اعلان منگل کو بینڈ کے آفیشل فیس بک پیج پر کیا گیا۔ فیس بک کی پوسٹ میں لکھا گیا کہ ’فرہاد ہمیں آج چھوڑ کے چلے گئے، فرہاد چاہتے تھے کہ ان کی زندگی کو اچھے طریقے سے یاد کیا جائے ، لہذا ہم ان کے اہل خانہ، دوستوں اور مداحوں سے درخواست کرتے ہیں کہ وہ ان کی خواہش کا احترام کریں اور آج ان کے لیے دعا مانگیں۔‘

جیسے ہی فرہاد ہمایوں کی انتقال کی خبر سامنے آئی ان کے مداحوں نے سوشل میڈیا پلیٹ فارمز پر ان کی موت پر افسوس کا اظہار کیا اور اپنے تبصروں میں ان کی موسیقی سے جڑی یادیں تازہ کرنے لگے۔

فرہاد ہمایوں کے کزن اور موسیقار تیمور رحمان نے اپنے آفیشل ٹوئٹر اکاؤنٹ سے ٹویت کرتے ہوئے ان کے انتقال کی خبر کی تصدیق کرتے ہوئے لکھا کہ ’میرے کزن فرہاد ہمایوں کا انتقال ہوگیا ہے، وہ ایک زبردست موسیقار اور فنکار تھے، ان کے جانے سے خالی پن نے ہماری زندگی میں جگہ لے لی ہے۔‘

صارف نسیم اکرم نے لکھا کہ ’اندوہناک سچائیوں کے ساتھ زندگی کو قبول کرنا پڑتا یے۔ خدا آپ کو اس صدمے کو برداشت کرنے کے ہمت دے اور مرحوم کی مغفرت فرمائے۔‘

کامیڈین اور یوٹیوبر مورو نے فرہاد ہمایوں کے انتقال کی خبر پر غم اور دکھ کا اظہار کرتے ہوئے اپنے ٹوئٹر اکاؤنٹ پر لکھا کہ ’میں اوور لوڈ سنتے بڑا ہوا، میں اس بینڈ سے بہت متاثر ہوتا تھا، فرہاد ہمایو ٹین دور میں میرے پاکستانی میوزیکل ہیرو تھے۔ یہ سن کر افسوس ہوا کہ ان کا انتقال ہوگیا۔ وہ ہمیشہ ڈرمز کے بادشاہ رہیں گے۔۔ﷲ مغفرت فرمائے۔‘