ریاض میں دو شہری گرفتار، متعدد ہتھیار، گولیاں اور منشیات ضبط

ریاض میں دو افراد کو گرفتار کیا گیا ہے جن کے قبضے سے متعدد قسم کا اسلحہ، گولیاں، موبائل اور منشیات ضبط ہوئے ہیں۔

سعودی پریس ایجنسی کے مطابق گرفتار شدگان سعودی شہری ہیں اور عمر کی تیسری دہائی میں ہیں۔

ریاض ریجن پولیس کے ترجمان میجر خالد الکریدیس نے کہا ہے کہ ’جرائم کے انسداد اور مجرموں کا تعاقب کرنے والا ادارہ مذکورہ افراد کو گرفتار کرنے میں کامیاب ہوا ہے‘۔

’گرفتار شدگان کے قبضے سے 27 مختلف قسم کے ہتھیار، 373 گولیاں، دو کلو حشیش، 410 نشہ آور گولیاں، جعلی نوٹ اور مختلف قسم کے 73 موبائل پکڑے گئے ہیں‘۔

ترجمان نے کہا ہے کہ ’مذکورہ افراد سے تفتیش جاری ہے، ضابطے کی کارروائی مکمل کرنے کے بعد انہیں پبلک پراسیکیوشن کے حوالے کردیا جائے گا‘۔