بحرانوں کے حل کے لیے سعودی عرب کردار ادا کرتا رہے گا: شاہ سلمان

خادم حرمین شریفین شاہ سلمان بن عبد العزیز نے کہا ہے کہ دنیا کے بحرانوں کے حل کے لیے سعودی عرب اپنا کردار ادا کرتا رہے گا۔

العربیہ اور سبق ویب سائٹ کے مطابق شاہ سلمان بن عبد العزیز روما میں منعقد جی 20 سربراہ کانفرنس کے افتتاحی اجلاس سے آن لائن خطاب کر رہے تھے۔

انہوں نے کہا ہے کہ ’پسماندہ ممالک کو کورونا ویکسین کے حصول میں مشکلات کا سامنا ہے لہذا اس بحران سے نمٹنے کے لیے مشترکہ کوششیں کرنی چاہئیں‘۔

انہوں نے کہا ہے کہ ’ماحولیاتی تبدیلی اور اس کے باعث معیشتوں پر اثر اندازی پر ہمیں بھی دنیا کے ساتھ پریشانی ہے‘۔

انہوں نے کہا ہے کہ ’دنیا کی معیشت کی بہتری اور صحت کے شعبے کے علاوہ عالمی بحرانوں کے حل میں سعودی عرب اپنا کردار ادا کرتا رہے گا‘۔

شاہ سلمان نے کہا ہے کہ ’جی 20 ممالک کے کورونا بحران سے نمٹنے کے لیے کے  گئے اقدامات تاریخی ہیں‘۔

قبل ازیں اٹلی میں منعقد جی 20 ممالک میں سعودی عرب کی نمائندگی کے لیے وزیر خارجہ شہزادہ فیصل بن فرحان اجتماع گاہ پہنچ گئے تھے۔

واضح رہے کہ جی 20 سربراہ کانفرنس میں ماحولیات اور کورونا بحران کے بعد معیشت کی بحالی ایجنڈے کے اہم اجزا ہیں ۔