ایکسپودبئی: اومی کرون کی وجہ سے سرگرمیاں محدود، ایس اوپیز جاری

 کورونا وائرس کی نئی شکل ’اومی کرون‘کی صورتحال کو دیکھتے ہوئے ایکسپو دبئی کی سرگرمیاں محدود کرتے ہوئے نئے ایس اوپیز جاری کردیئے گئے۔

اماراتی خبر رساں ادارے’ وام‘ کے مطابق ایکسپو دبئی میں شائقین کی تعداد 70 لاکھ کی حد عبور کر چکی ہے۔ 71 لاکھ 67 ہزار 591 افراد ایکسپو میں شرکت کر چکے ہیں ۔

انتظامیہ نے شائقین کےدرمیان سماجی فاصلے کو یقینی بنانے اور ازدحام کے باعث ’اومی کورن ‘ وائرس پھیلنے کے امکانات پر قابو پانے کےلیےعارضی طور پر بعض پروگرام معطل کر دیے ہیں۔

احتیاطی تدبیر کے تحت گھوم پھر کر تفریحی پروگرام پیش کرانے والے فنکاروں کو پروگرام بند کرنے کی سختی سے ہدایت کر دی گئی ہے۔  

ایکسپو دبئی 2020 کی انتظامیہ نے تمام کارکنان پر پابندی لگائی ہے کہ وہ ہنگامی بنیادوں پر پی سی آر ٹیسٹ کرالیں۔ 

ایکسپو دبئی انتظامیہ نے پی سی آر ٹیسٹ میں سہولت پیدا کرنے کےلیے صحت اداروں کی تعداد میں اضافہ کر دیا ہے۔ نمائش گاہ میں 4 پوائنٹ پی سی آر ٹیسٹ کےلیے مختص کر دیے ہیں۔

ایکسپو میں شریک ممالک کے پویلینز کے تمام کارکنان کے لیے پی سی آر ٹیسٹ مفت کر دیا گیا ہے۔  

ایکسپو آنے والے 18 برس اور اس سے زیادہ عمر کے تمام شائقین سے کہا گیا ہے کہ وہ ویکسین سرٹیفکیٹ یا پی سی آر ٹیسٹ رپورٹ پیش کریں گے جس کے نمونے پر 72 گھنٹے سے زیادہ نہ گزرے ہوں ۔ شائقین کو سماجی فاصلے اور ماسک  کے استعمال کا بھی پابند بنایاگیا ہے۔ صحت اداروں کی جانب سے کہا گیا احتیاطی تدابیر اختیار کرتے ہوئے مقررہ ضوابط کی سختی سے پابندی کریں اگرکسی میں کورونا کی علامات کا خدشہ ہوتو اسے چاہئے کہ وہ فوری طورپر کورونا ٹیسٹ کرائے