ایران سے سمگل شدہ اسلحہ امریکی نیوی کے قبضے میں

امریکی نیوی نے ایک کشتی میں موجود رائفل اور دیگر اسلحے کا ڈھیر پکڑ لیا ہے جو ایران سے ممکنہ طور یمن سمگل کیا جا رہا تھا۔

خبر رساں ادارے ایسوسی ایٹڈ پریس کے مطابق امریکی نیوی کے جہازوں نے پٹرولنگ کے دوران مچھلیاں پکڑنے والی ایک ایسی کشتی میں سے اسلحہ برآمد کیا تھی جس کا کسی ملک سے تعلق نہیں ہے۔

بحیرہ عرب کے شمالی حصوں میں پیر کو شروع ہونے والے آپریشن میں ایک ہزار 400 کلاشنکوف رائفل اور دو لاکھ 26 ہزار 600 گولیاں ملی ہیں۔ کشتی میں یمن سے تعلق رکھنے والے پانچ افراد کا عملہ بھی موجود تھا۔

مغربی ممالک اور اقوام متحدہ کے ماہرین کئی مرتبہ ایران پر الزام عائد کر چکے ہیں کہ وہ غیر قانونی طریقے سے ہتھیار اور ٹیکھنالوجی یمن میں سمگل کروا رہا ہے جس سے خانہ جنگی کی آگ مزید بھڑک رہی ہے جبکہ حوثیوں کو سعودی عرب میں ڈرون اور میزائل مارنے میں مدد فراہم ہوتی ہے۔

ثبوت کے باوجود ایران حوثیوں کو اسلحہ بھجوانے کے الزامات مسترد کر چکا ہے۔

ایرانی نیوی کی جانب سے بدھ کو رات گئے جاری بیان میں کہا گیا ہے کہ متعلقہ کشتی سمندر میں اس راستے پر موجود تھی جو تاریخی طور پر یمن میں حوثیوں کو غیر قانونی اسلحہ پہنچانے کے لیے استعمال ہوتا ہے۔

بیان کے مطابق ’حوثیوں کو براہ راست یا بالواسطہ طور پر ہتھیار بیچنا یا منتقل کرنا اقوام متحدہ کے سکیورٹی کونسل کی قراردادوں اور امریکی پابندیوں کے خلاف ہے۔‘

امریکی نیوی کے بحرین میں تعینات پانچویں بیڑے نے کہا ہے کہ اس سال کے دوران ڈھائی ملین مربع میل کے علاقے میں آٹھ ہزار 700 غیر قانونی ہتھیار قبضے میں لیے ہیں۔