جج کا ٹینس سٹار نوواک جوکوچ کو رلیز کرنے کا حکم ’پاسپورٹ جلد واپس کیا جائے‘

ٹینس سٹار نوواک جوکوچ کے آسٹریلیا میں کھیلنے سے متعلق جج نے فیصلہ کیا ہے کہ انہیں رلیز کر دیا جائے گا۔

واضح رہے کہ سربیا سے تعلق رکھنے والے عالمی نمبر ایک ٹینس سٹار نوواک جوکوچ کو آسٹریلوی حکومت نے کورونا کی حفاظتی شرائط پوری نہ کرنے پر ملک میں داخل ہونے سے روک دیا ہے۔

تاہم امریکی نشریاتی ادارے سی این این کے مطابق جج اینتھونی کیلی نے حکومت کے نوواک جوکوچ کا ویزہ کینسل کرنے کے فیصلے کو رد کردیا ہے اور حکم جاری کیا ہے کہ انہیں فیصلہ سنائے جانے کے 30 منٹ کے اندر اندر رلیز کیا جائے۔

فیصلے کے مطابق اس کیس میں جواب دہندگان وزارت داخلہ ہے جسے نوواک جوکوچ کو طے شدہ قیمت ادا کرنی ہوگی۔

ان کی تمام چیزیں بشمول پاسپورٹ کو انہیں ’جتنا جلدی ہوسکے‘ واپس کی جائیں۔

نوواک جوکوچ کے ساتھ کیا ہوا تھا؟

خبر رساں ادارے روئٹرز کے مطابق عالمی نمبر ایک ٹینس سٹار نو مرتبہ اوپن ٹینس کے چیمپئین رہ چکے ہیں جو آسٹریلین اوپن میں شرکت کی غرض سے جمعرات کو آسٹریلیا پہنچے تھے۔

آسٹریلوی بارڈر فورس نے تصدیق کی ہے کہ ٹینس سٹار کا ویزہ بھی منسوخ کر دیا گیا تھا۔

آسٹریلیا کے وزیراعظم سکاٹ موریسن نے جمعرات کو ایک ٹویٹ میں بتایا تھا کہ ’نوواک جوکوچ کا ویزا منسوخ کر دیا ہے۔ اصول، اصول ہوتے ہیں خاص طور پر جب بات ہماری سرحدوں کی ہوتی ہے۔‘

سکاٹ موریسن نے اپنے پیغام میں مزید کہا کہ ’کوئی بھی شخص قانون سے بالاتر نہیں ہے۔ کورونا وائرس کے باعث لگائی گئی سخت پابندیوں کی وجہ سے آسٹریلیا کم ترین کورونا کے کیسز والے ممالک میں شامل رہا، اور ہم آگے بھی محتاط رہیں گے۔‘

منگل کو نوواک جوکوچ نے ٹویٹ کی جس میں انہوں نے اپنے مداحوں کو نئے سال کی مبارکباد دی۔ انہوں نے اسٹریلیا میں داخلے پر پابندی لگنے کے حوالے سے مایوسی کا اظہار کیا تھا۔

واضح رہے کہ آسٹریلن اوپن کے دفاعی چیمپیئن نوواک جوکوچ ماضی میں کرونا وائرس ویکسین لگوانے کی مخالفت کرتے ہوئے نظر آئے ہیں۔ آسٹریلیا آمد سے قبل انہوں نے دعویٰ کیا تھا کہ انہیں ویکسین لگوائے بغیر ہی ٹورنامنٹ کھیلنے کی اجازت مل گئی ہے۔

اس وقت جوکوچ میلبرن میں امیگریشن کے ایک حراستی مرکز میں موجود ہیں اور انہیں ڈیپورٹ کیا جاسکتا ہے۔

سربین سٹار نے آسٹریلوی حکومت کے اس فیصلے کو عدالت میں چیلنج کردیا ہے۔ ان کی ڈیپورٹیشن کے حوالے سے اپیل آسٹریلوی وقت کے مطابق 4 بجے ایک عدالت میں سنی جائے گی۔

دوسری جانب سربیا کے صدر الیکزینڈر وچچ نے جوکوچ کی حمایت میں جاری ایک بیان میں کہا کہ ’پورا سربیا ان (جوکوچ) کے ساتھ ہے۔‘

’بین الاقوامی قوانین کی روشنی میں سربیا نوواک جوکوچ کا مقدمہ لڑے گا انصاف کے لیے اور سچ کے لیے۔‘