سب سے زیادہ زائرین کا تعلق بنگلہ دیش سے ہے(فوٹو ایس پی اے)
سعودی وزارت حج و عمرہ نے کہا ہے کہ ’اس سال بری اور فضائی راستوں سے مختلف ممالک کے دو لاکھ 66 ہزار 824 عازمین حج مسجد نبوی کی زیارت کے لیے مدینہ منورہ پہنچ چکے ہیں‘۔
سرکاری خبر رساں ایس پی اے کے مطابق وزارت حج و عمرہ کے ماتحت ادارہ شماریات نے بتایا کہ’ مختلف ملکوں کے دو لاکھ 15 ہزار580 عازمین مدینہ منورہ کے امیر محمد بن عبدالعزیز انٹرنیشنل ایئرپورٹ اور17 ہزار 774 بری راستوں سے الھجرۃ استقبالیہ سینٹر پہنچے ہیں‘۔
ادارہ شماریات نے بتایا کہ ’اس سال اب تک مدینہ منورہ پہنچنے والے سب سے زیادہ زائرین کا تعلق بنگلہ دیش سے ہے ان کی تعداد 12627 ریکارڈ کی گئی۔
ایک لاکھ 71 ہزار عازمین مدینہ سے مکہ کے لیے روانہ ہوگئے(فوٹو ایس پی اے)
نائجیریا کے عازمین کی تعداد 9452 ، انڈیا کے 8857 ، انڈونیشیا کے 7174 اورعراق کے 6661 رہی ہے‘۔
وزارت حج و عمرہ کا کہنا ہے کہ’ مسجد نبوی کی زیارت کے بعد ایک لاکھ 71 ہزار606 عازمین مدینہ منورہ سے مکہ مکرمہ کے لیے روانہ ہوگئے جہاں سے وہ عازمین 8 ذی الحجہ کو منی کے لیے روانہ ہوں گے‘۔
مدینہ منورہ میں 25 جون تک موجود عازمین حج کی تعداد 95194 ریکارڈ کی گئی۔ ان کا تعلق مختلف ممالک سے ہے۔
