امریکہ سمیت کسی سے دشمنی نہیں چاہتے، برابری کا تعلق چاہتے ہیں: عمران خان

سابق وزیراعظم اور چیئرمین تحریک انصاف عمران خان نے کہا ہے کہ ’17 جولائی کو حکومت نے دھاندلی کے ریکارڈ توڑنے کا پروگرام بنا رکھا ہے، لیکن تحریک انصاف 20 کے 20 حلقوں میں ضمنی الیکشنز جیتے گی۔‘

جمعے کو فیصل آباد کی تحصیل چک جھمرہ میں ضمنی انتخاب کے جلسے سے خطاب کرتے ہوئے انہوں نے کہا کہ آپ سب نے آخری گیند تک مقابلہ کرنا ہے، ہم نے حمزہ شہباز کو شکست دینی ہے۔‘

’قوم 17 جولائی کو لوٹوں کو بلے سے پھینٹا لگتے دیکھے گی، ان دو خاندانوں کو جنہوں نے بھی سازش کے ذریعے اوپر بٹھایا قوم انہیں معاف نہیں کرے گی، اتوار کے روز ہم جان لڑائیں گے اور پنجاب کا سیاسی میچ جیت کر دکھائیں گے۔‘

ان کا کہنا تھا کہ ’ضمنی الیکشنز میں جیت کے بعد ہم جشن منائیں گے، نوجوان دھاندلی کا مقابلہ کرنے کے لیے تیار رہیں، سازش کے ذریعے اقتدار میں آنے والے امپورٹڈ حکمرانوں کو ناکامی کا سامنا کرنا پڑے گا۔‘

عمران خان کا کہنا تھا کہ ’شہباز حکومت کے آتے ہی نیب قانون میں ترمیم کی گئی، لیکن میں قوم کے 1100 ارب روپے ان چوروں کو ہضم نہیں کرنے دوں گا۔ ’میں سپریم کورٹ میں گیا ہوں، آخری گیند تک ان چوروں کا مقابلہ کروں گا۔‘

انہوں نے کہا کہ ’اس ملک میں ہونے والی سازش کو میر جعفر اور میر صادق نے کامیاب کروایا، سازش کر کے چوروں کو ہمارے اوپر مسلط کیا گیا۔‘

سابق وزیراعظم نے کہا کہ ’کیا امریکہ ہمارا خیرخواہ اور اس ملک کی بہتری چاہتا ہے؟ امریکہ تابعدار حکمران چاہتا ہے، ایک فون کال پر پرویز مشرف نے گھٹنے ٹیک دیے تھے۔‘

’آج بھی ہمارے فوجی جوان سرحدوں پر قربانیاں دے رہے ہیں، آصف زرداری اور نواز شریف آئے تو قوم نے سمجھا یہ جمہوری لیڈر ہیں، ان دونوں کے دور حکومت میں امریکہ نے 400 ڈرون حملے کیے جن میں خواتین اور بچوں سمیت ہزاروں افراد مارے گئے۔‘

انہوں نے کہا کہ ’ہم امریکہ سمیت سب کے ساتھ اچھے تعلقات چاہتے ہیں لیکن کسی کی غلامی قبول نہیں، امریکہ ان حکمرانوں کو ٹشو پیپر کی طرح استعمال کرے گا۔ امریکہ کو میرے جیسا آزاد لیڈر پسند نہیں، وہ بوٹ پالش کرنے والے شہباز شریف کو پسند کرتا ہے۔‘