کنگ فہد ایئرپورٹ پر سامان سے متعلق نئی پالیسی کیا ہے؟
تھیلوں میں اوررسیوں سے بندھے صندوق وغیرہ لیے جانے کی اجازت نہیں (فوٹو، ٹوئٹر)
کنگ فہد انٹرنیشنل ایئرپورٹ دمام کی انتظامیہ نے سامان سے متعلق مسافروں کے لیے نئی پالیسیاں جاری کردی ہیں۔
اخبار 24 کے مطابق کنگ فہد ایئرپورٹ کی انتظامیہ نے کہا ہے کہ مسافروں کے لیے ضروری ہے کہ اپنے ساتھ لے جانے والے سامان کو مقررہ ضوابط کے مطابق پیک کریں۔
سامان یکساں انداز میں پیک کیا گیا ہو۔ چاروں طرف سے پیکنگ ایک جیسی ہو۔
اٹیچی کیس میں سامان موزوں طریقے سے رکھا ہوا ہو اور باہر سے اس کی شیپ (شکل) ٹھیک نظر آ رہی ہو۔
کنگ فہد انٹرنیشنل ایئرپورٹ انتظامیہ نے تاکید کی ہے کہ نئی پالیسی کے تحت ایسا سامان فضائی مسافر اپنے ہمراہ نہیں لے جا سکتے جن کی شکل موزوں نہ ہو اور دائرہ دار ہو۔ ایسا سامان بھی نہیں لے جایا جا سکتا جو رسی کی مدد سے باندھ کر غلط انداز میں پیک کیا گیا ہو۔ اسی طرح لمبے پٹے والا سامان لے جانے پر بھی پابندی ہے۔
