’پاکستان کی تھنڈر جرسی تو آگئی ہے اب ہم تھنڈر کارکردگی کے منتظر‘

پاکستان کرکٹ بورڈ (پی سی بی) نے آئی سی سی ٹی20 ورلڈ کپ کے لیے پاکستانی ٹیم کی نئی کٹ نے لانچ کردی ہے۔
پاکستان کرکٹ ٹیم کی اس جرسی کو ’تھنڈر‘ کا نام دیا گیا ہے۔

ٹی20 ورلڈ کپ کے لیے ٹیم کی مرکزی جرسی سبز رنگ کی ہے جس میں پیلے رنگ کی دھاریاں شامل ہیں جبکہ دوسری جرسی نیلے رنگ کی ہے جس میں سبز رنگ کی دھاریاں بنی ہوئی ہیں۔
ٹیم جرسی کو پیر کے روز پی سی بی نے سماجی رابطوں کی ویب سائٹ ٹوئٹر پر ویڈیو کے ذریعے لانچ کیا۔
ویڈیو میں پاکستان کرکٹ ٹیم کے کپتان بابراعظم، نائب کپتان شاداب خان، نسیم شاہ جبکہ پاکستان ویمن ٹیم کی کھلاڑی کائنات امتیاز اور فاطمہ ثنا نئی جرسی میں نظر آرہے ہیں۔

پاکستان کرکٹ ٹیم کی نئی جرسی پر قومی ٹیم کے مداحوں کی جانب سے بھی ٹوئٹر پر تبصرے دیکھنے میں آرہے ہیں۔
ٹوئٹر صارف مانی کہتے ہیں کہ ’یہ اچھی کِٹ ہے اور ٹیم اگر پرفارم اچھا کرے گی تو یہ مزید اچھی لگے گی، سب سے اہم ٹیم کا پرفارم کرنا ہے۔‘

شان ٹیٹ (فین اکاؤںٹ) نے لکھا ہے کہ ’تھنڈر جرسی آگئی ہے، اب آسٹریلیا میں ہماری پیس بیٹری کی جانب سے تھنڈر بولٹس کا انتظار کریں۔‘

صحافی سہیل عمران نے کہا کہ ’تھنڈر جرسی تو آگئی ہے اب ٹی20 ورلڈ کپ میں کارکردگی کے تھنڈر کے منتظر ہیں گڈ لک بوائز۔‘

غلام حیدر لکھتے ہیں کہ ’لوگ جو بھی کہیں لیکن یہ جرسی اچھی ہے۔‘