بیرون ملک مقیم پاکستانی ملک کی ترقی میں بڑھ چڑھ کر حصہ لیں: صدر مملکت

صدرمملکت ڈاکٹرعارف علوی نے بیرون ملک مقیم پاکستانیوں پر زوردیا ہے کہ وہ ملک کی ترقی و خوشحالی میں بڑھ چڑھ کر حصہ لیتے ہوئے اپنے علم و دانش، تجربات اور مہارتوں کو بروئے کار لائیں اور جدید سوشل میڈیا پلیٹ فارمز کے ذریعے اپنے ہم وطنوں کی رہنمائی کریں۔ 

 بدھ کو اسلام آباد بیرون ملک مقیم پاکستانیوں کی قابل قدر خدمات کے اعتراف میں ایک تقریب سے خطاب کرتے ہوئے صدر مملکت نے کہا کہ پاکستان کو تعلیم یافتہ، تربیت یافتہ اوراعلیٰ پیداواری انسانی وسائل کی ضرورت ہے جو کہ ملک کی ترقی و خوشحالی کو یقینی بنانے کے لیے بنیادی عنصر ہے۔ 

انہوں نے ان تمام متعلقہ فریقوں، حکومت اور نجی شعبہ پر زور دیا  کہ وہ پیداواری انسانی وسائل سے استفادہ کے لیے اور سازگار ماحول پیدا کرنے کے لیے ٹھوس اور جامع اقدامات کریں۔ ماضی میں تربیت یافتہ افرادی قوت کی کمی کے باعث ملک کے جسمانی وسائل بروئے کار نہیں لائے جا سکے جس سے ملک کی ترقی وخوشحالی پر منفی اثر پڑا۔ 

انہوں نے کہا کہ وہ بیرون ملک مقیم پاکستانیوں کے لیے ووٹ کے حق کے حصول کے لیے کوششیں کر رہے ہیں جو کہ ٹیکنالوجی اور ای ووٹنگ سے باآسانی ممکن ہے۔ بیرون ملک مقیم پاکستانیوں کی اکثریت ان ممالک کے قوانین کے باعث پوسٹل بیلٹ حاصل نہیں کرسکتی، اور نہ ہی  ان کے لیے اپنا ووٹ ڈالنے کے لیے پاکستان آنا ممکن ہے۔ اس لیے قابل اعتماد تصدیق شدہ اور ٹیکنالوجی پر مبنی الیکٹرانک ووٹنگ کا نظام بہترین ممکنہ حل ہے۔

انہوں نے کہا کہ دنیا ٹیکنالوجی کی مدد سے تیزی سے ترقی کر رہی ہے تاہم بدقسمتی سے ہمارا ملک ٹیکنالوجی میں بہت پیچھے رہ گیا ہے۔ 

صدر نے متعلقہ اداروں پر زوردیا کہ وہ بیرون ملک مقیم پاکستانیوں کو ووٹنگ کا حق دینے کے لیے ٹیکنالوجی پر مبنی سلوشنز پر عمل کریں۔ بیرون ملک مقیم پاکستانیوں میں اپنے بچوں کو قابل قبول سماجی و ثقافتی ماحول کی فراہمی کے لیے ملک میں واپس آ کر بسنے کا رجحان بڑھ رہا ہے جو کہ خوش آئند ہے۔

’ہمیں ان کی اعلیٰ معیاری تعلیم، علم  اور مہارتوں کو اپنی مصنوعات اور خدمات کے معیار میں بہتری کے لیے بروئے کار لانا چاہیے۔‘

انہوں نے حکومت پر زور دیا کہ وہ اہلیت، تعلیم اور اعلیٰ معیاری انسانی وسائل کو ملازمتوں کے لیے تمام ضروری اقدامات اٹھائے جو کہ ملک کی معیشت کے تمام شعبوں میں ترقی کے لیے ضروری ہے۔

ان کا کہنا تھا کہ تربیت یافتہ اور تعلیم یافتہ انسانی وسائل کے معیار اور مقدار میں بہتری اپنے کاروباری شعبے میں قانون پر منصفانہ اور شفاف عمل اور قابل تصدیق اور عملی کاروباری سرگرمیوں سے ہماری معیشت اور مالیاتی اشاریوں میں بہتری آئے گی۔ 

صدر مملکت نے ملک میں اپنی محنت کی کمائی سے ترسیلات زر بھیج کر ملک کی معیشت کو مضبوط کرنے پر بیرون ملک پاکستانیوں کے کردار کو سراہا اور کہا کہ ایک کروڑ پاکستانی بیرون ملک مقیم ہیں اور وہ سب پاکستان کے سفیر ہیں۔

 انہوں نے ان سے درخواست کی کہ وہ ترسیلات زر باضابطہ بینکنگ چینلز سے بھیجیں تاکہ ان کی محنت کی کمائی ملک کی ترقی و خوشحالی کے لیے استعمال ہوسکے۔  

چیئرمین ویلفیئر سوسائٹی فار اوورسیز پاکستانیز رائٹس داؤد غزنوی نے  کہا کہ ملک کی تاریخ میں پہلی بار بیرون ملک مقیم پاکستانیوں کی کامیابیوں کا جشن منایا جارہا ہے اور ان کی قابل قدر خدمات کا اعتراف کیا جارہا ہے۔  

صدر مملکت نے مختلف شعبوں میں نمایاں مقام حاصل کرنے والے اوورسیز پاکستانیوں میں ایوارڈز بھی تقسیم کیے۔