امارات پہلا خلائی مشن 28 نومبر کو چاند پر بھیجے گا

متحدہ عرب امارات نے مریخ کے بعد چاند کے اسرار دریافت کرنے کے لیے پہلا اماراتی خلائی مشن (ایکسپلورر راشد) 28 نومبر کو چاند پر بھیجنے کا اعلان کیا ہے۔

مشن کی کامیابی کی صورت میں امارات امریکہ، روس اور چین کے بعد چاند کی سطح پر اترنے والا پہلا عرب اور دنیا کا چوتھا ملک بن جائے گا۔

الامارات الیوم کے مطابق محمد بن راشد خلائی سینٹر کی جانب سے ایک بیان میں کہا گیا ہے کہ ’امارات کے مقامی وقت کے مطابق پہلا اماراتی خلائی مشن 28 نومبر کو 12 بج کر 46 منٹ پرروانہ کیا جائے گا۔‘

بیان کے مطابق ’تاریخ اور وقت میں موسمی حالات یا دیگر امور کی وجہ سے تبدیلی ہو سکتی ہے۔‘۔ 

یہ اعلان اٹلس کے دھانے پر ایکسپلورر راشد کی لینڈنگ کے مقام کی تصدیق کے بعد کیا گیا ہے۔ اطمینان حاصل ہوگیا تھا کہ ایکسپلورر راشد 47.5 ڈگری شمال اور 44.4 ڈگری مشرق میں میئر فریگورس زون کے جنوب مشرق میں بیرونی کنارے پر اترا جسے چاند کے انتہائی شمال میں واقع ’بحر البرد‘ ( ٹھنڈک کا سمندر) کہا جاتا ہے۔  

اٹلس کا دھانہ ایسا مقام ہے جسے اس سے قبل کسی بھی خلائی مشن نے دریافت نہیں کیا۔

خلائی مشن اس وقت امریکہ کے کیپ کینورل خلائی بیس 40 میں موجود ہے۔ روانگی کی تاریخ قریب آنے پر اسے لانچنگ پیڈ پر منتقل کردیا جائے گا۔ 

آئی سپیس کے مطابق خلائی گاڑی براہ راست چاند کا رخ کرنے کے بجائے کم توانائی والے ٹریک کا انتخاب کرے گی۔ روانگی کے پانچ ماہ بعد مارچ  2023 میں چاند پر اترے گی۔

یاد رہے کہ چاند کی دنیا کا پتہ لگانے والے اماراتی روور کو ’راشد‘ نام دیا گیا ہے۔ 

مشن کا مقصد چاند کی سطح کی مختلف پہلوؤں سے جانچ کرنا ہے جن میں چاند کی مٹی اور اس کی تشکیل اور اجزا، اس کی حرارتی خصوصیات اور ترسیل کی خصوصیات کی جانچ کی جائے گی۔ مشن کے دوران روور چاند کی سطح کی تصاویر لے گا اور دبئی کے کنٹرول روم میں واپس بھیجے گا۔ مشن مادی سائنس، روبوٹکس، نقل و حرکت، نیویگیشن اور مواصلات میں نئی ​​ٹیکنالوجیز کا بھی تجربہ کرے گا۔