دبئی کے ولی عہد کا پہلا سرکاری دورہ انڈیا، نریندر مودی اور کابینہ ارکان سے ملاقات

دبئی کے ولی عہد شیخ حمدان بن محمد بن راشد المکتوم انڈیا کے پہلے سرکاری دورے پر منگل کو نئی دہلی پہنچے جہاں انہوں نے وزیراعظم نریندر مودی اور ان کی کابینہ کے ارکان سے ملاقات کی۔

عرب نیوز کے مطابق شیخ حمدان جو وزرا، اعلٰی سرکاری حکام اور کاروباری شخصیات کے ایک وفد کی قیادت کر رہے ہیں، نئی دہلی اور ممبئی کے دو روزہ دورے پر ہیں۔ 

واضح رہے کہ دبئی کے ساتھ انڈیا کے اقتصادی تعلقات 2022 میں متحدہ عرب امارات اور انڈیا کے درمیان جامع اقتصادی شراکت داری کے معاہدے کے بعد تیزی سے بڑھ رہے ہیں۔ 

اس معاہدے کے ذریعے تجارتی رکاوٹیں ختم اور ٹیرف میں کمی کی گئی ہے جس سے کاروباری سرگرمیوں میں آسانی پیدا ہوئی ہے، اس سے دونوں ممالک کی کمپنیوں کے لیے ایک دوسرے کی منڈیوں تک رسائی بھی آسان ہو گئی ہے۔

ولی عہد سے ملاقات کے بعد وزیراعظم نریندر مودی نے سوشل میڈیا پلیٹ فارم ’ایکس‘ پر بتایا کہ دبئی نے انڈیا اور متحدہ عرب امارات کے درمیان جامع تزویراتی شراکت داری کو آگے بڑھانے میں کلیدی کردار ادا کیا ہے۔‘

انہوں نے مزید کہا کہ ’یہ خصوصی دورہ ہماری گہری دوستی کا اعادہ کرتا ہے اور مستقبل میں دونوں ممالک کے درمیان مزید مضبوط تعاون کی راہ ہموار کرے گا۔‘ 

اماراتی میڈیا آفس کے اعداد و شمار کے مطابق ’دبئی اور انڈیا کے درمیان 2019 میں تجارتی حجم 36 ارب 70 کروڑ ڈالر تھا جو 2023 میں تقریباً 45 ارب 40 کروڑ ڈالر تک پہنچ گیا۔‘

سنہ 2024 میں انڈیا دبئی میں سب سے زیادہ سرمایہ کاری کرنے والا ملک تھا جس نے مختلف شعبوں میں تین ارب ڈالر سے زیادہ کی براہِ راست غیر ملکی سرمایہ کاری کی تھی۔

ان شعبوں میں کاروباری خدمات، سوفٹ ویئر اور آئی ٹی خدمات، صارفین کی مصنوعات، خوراک، مشروبات اور ریئل اسٹیٹ وغیرہ شامل ہیں۔ گذشتہ سال تک 70 سے زیادہ انڈین کمپنیاں دبئی چیمبر آف کامرس کے ساتھ منسلک ہوئیں۔

دبئی کے ولی عہد نے ’ایکس‘ پر لکھا کہ ’آج وزیراعظم نریندر مودی سے نئی دہلی میں ملاقات کرکے خوشی ہوئی، ہماری بات چیت سے دونوں ممالک کے درمیان دو طرفہ تعلقات کو مزید فروغ حاصل ہوگا۔‘

شیخ حمدان، جو متحدہ عرب امارات کے وزیر دفاع بھی ہیں، نے دورے کے دوران اپنے انڈین ہم منصب راج ناتھ سنگھ اور وزیر خارجہ ایس جے شنکر سے بھی ملاقاتیں کیں۔ 

نئی دہلی کے بعد شیخ حمدان اپنے دورے کے اگلے مرحلے میں ممبئی جائیں گے جہاں وہ متحدہ عرب امارات اور انڈیا کے صف اول کی کاروباری شخصیات کے ساتھ اجلاس میں شریک ہوں گے۔