پاکستانی اب متحدہ عرب امارات کا پانچ سال کا ویزہ لے سکتے ہیں: اماراتی سفیر

متحدہ عرب امارات (یو اے ای) کے پاکستان میں سفیر حماد عبید الزعابی نے کہا ہے کہ ’ویزے کے مسائل حل ہو گئے ہیں اور پاکستانی اب پانچ سال کا ویزہ لے سکتے ہیں۔‘

گورنر ہاؤس سندھ سے منگل کو جاری کردہ بیان کے مطابق اماراتی سفیر نے یہ بات گورنر سندھ کامران خان ٹیسوری سے ملاقات کے دوران کہی ہے۔

بیان کے مطابق اس موقعے پر متحدہ عرب امارات کے قونصل جنرل بخیط عتیق الرومیثی بھی موجود تھے۔

گورنر سندھ نے صوبہ بالخصوص کراچی میں سرمایہ کاری کرنے پر متحدہ عرب امارات کے سفیر حماد عبید الزعابی کا شکریہ ادا کیا۔

اس موقعے پر یو اے ای کے سفیر نے گورنر سندھ کو کراچی میں قائم ویزہ سینٹر آنے کی دعوت بھی دی۔

یو اے ای کے سفیر حماد عبید الذعابی کا کہنا تھا کہ ’گورنر انیشیٹیو کے تحت جاری منصوبے لائق تحسین ہیں۔

بیان کے مطابق یو اے ای کے سفیر نے گورنر ہاؤس میں شجر کاری مہم کے تحت پودا لگایا اور پرچم کشائی بھی کی۔