’راجہ جی پنڈی جُلساں‘، برطانوی ہائی کمشنر میچ دیکھنے رکشے میں روانہ

پاکستان میں برطانوی ہائی کمشنر کرسچن ٹرنز راولپنڈی میں جاری پاکستان اور انگلینڈ کے درمیان پہلا ٹیسٹ میچ دیکھنے رکشے میں روانہ ہوئے۔

جمعرات کو انگلینڈ اور پاکستان کے درمیان پہلا ٹیسٹ راولپنڈی کرکٹ سٹیڈیم میں شروع ہو چکا ہے جہاں مہمان ٹیم نے ٹاس جیت کر پہلے بیٹنگ کا فیصلہ کیا ہے۔

برطانوی ہائی کمشنر 17 سال بعد پاکستان اور انگلینڈ کے درمیان پاکستان میں ہونے والی ٹیسٹ سیریز دیکھنے کے لیے انتہائی پُرجوش نظر آئے۔

انہوں نے میچ کے لیے روانہ ہونے سے قبل اردو زبان میں ایک ویڈیو بھی ریکارڈ کی اور پھر رکشہ ڈرائیور سے پوٹھوہاری زبان میں بھی بات کی۔

ان کا کہنا تھا کہ ’انگلینڈ اور پاکستان نے کرکٹ کی دنیا میں دھوم مچا دی ہے۔ ٹی20 سیریز کا دلچسپ مقابلہ رہا اور ٹی20 ورلڈ کپ کا فائنل بھی زبردست رہا اور دونوں بار انگلینڈ کے کرکٹرز بازی لے گئے۔‘

انہوں نے دونوں ٹیموں کے لیے نیک تمناؤں کا اظہار کرتے ہوئے کہا کہ ’لڑکوں جم کر کھیلنا کیونکہ ہے جذبہ جنون تو ہمت نہ ہار۔‘

اس کے بعد برطانوی ہائی کمشنر نے اپنا رُخ رکشے کی جانب کیا اور ڈرائیور نے ان سے سوال کیا ’کرسچن کتھے جُلسو؟‘ جس کا اردو میں مطلب ہے کر ’کرسچن کہاں جانا ہے؟‘

برطانوی ہائی کمشنر نے پلٹ کر جواب دیا ’راجہ جی، پنڈی جُلساں میچ تکساں‘ یعنی ’راجہ جی پنڈی جانا ہے اور میچ دیکھنا ہے۔‘