موسم سرما اور بارش، طائف کے پہاڑوں اور گھاٹیوں کا حسن دوبالا

سعودی عرب میں بارش اور سردی نے طائف کے پہاڑوں اور اس کی گھاٹیوں کی خوبصورتی میں اضافہ کر دیا ہے۔ 

سعودی خبررساں ادارے ایس پی اے کے مطابق طائف کا پورا علاقہ ان دنوں اپنے سرد موسم اور جمالیاتی مناظر کے باعث سیاحوں کی توجہ کا مرکز بنا ہوا ہے۔

طائف کے بلند و بالا پہاڑ اور خوبصورت وادیاں نئی چمک دمک کے ساتھ سامنے آ گئی ہیں۔ یہاں پہاڑوں کے درمیان سے پھوٹنے والی آبشاروں کے مناظر دعوت دیدار دے رہے ہیں۔ یہاں عرعر کے درخت، خوبصورت پودے اور پھلواریاں آنے والوں کا دل لبھا رہی ہیں۔

ایس پی اے کے فوٹو گرافر نے ان دنوں طائف کمشنری کے شاندار موسم اور دلکش مناظر کی تصاویر کیمرے میں قید کر کے سوشل میڈیا پر شیئر کی ہیں جو وائرل ہیں۔

طائف کا علاقہ خوشبو بکھیرنے والے پودوں اور پھلواریوں کے حوالے سے بھی مشہور ہے۔ یہاں پہاڑوں کی چوٹیوں پر موجود سبزہ زاروں کا حسن ان دنوں دگنا ہو گیا ہے۔ 

طائف تازگی بخش موسم اور خوشگوار مناظر کے حوالے سے مشہور ہے۔ یہاں کوہ پیما بھی دور دور سے آتے ہیں۔  جس سے ان کا یہاں قیام یادگار ہو جاتا ہے۔ ان دنوں بارش کے بعد طائف کی وادیوں اور گھاٹیوں کا دریاؤں میں تبدیل ہونا ایسا منظر ہے جسے دیکھنے کے  لیے لوگ سال کے  ان دنوں کا بے چینی سے انتظار کرتے ہیں۔

واٹس ایپ پر سعودی عرب کی خبروں کے لیے ”اردو نیوز“ گروپ جوائن کریں