فٹبال میچ کی ٹکٹ کی قیمت 30 لاکھ ریال تک پہنچ گئی، قصہ کیا ہے؟

دارالحکومت ریاض میں فٹبال میچ ہونے جا رہا ہے جس کی ممتاز، منفرد اور نمایاں ٹکٹ کی قیمت 30 لاکھ ریال تک پہنچ چکی ہے۔

سبق ویب سائٹ کے مطابق ممتاز ٹکٹ پر بولی 17 جنوری تک جاری رہے گی اور کوئی بعید نہیں اس کی قیمت میں مزید اضافہ ہو۔

آخر قصہ کیا ہے، یہ کونسا میچ ہے اور اس کی یہ ٹکٹ اتنی مہنگی کیوں ہے اور اس کی خاص بات کیا ہے؟

ریاض سیزن کے تحت ایک تاریخ فٹبال میچ پیرس سینٹ جرمین ’ایف سی‘ اور مقامی فٹبال کلب النصر اور الہلال کے سٹار کھلاڑیوں کے درمیان ہونے جا رہا ہے۔

اس میچ میں النصر کلب کے سٹار کھلاڑی کرسٹیانالو رونالڈو، میسی، نیمار اور دیگر سٹار کھلاڑی شریک ہوں گے۔

اس برادرانہ میچ کی خاص بات یہ ہے کہ اس میں الہلال اور النصر کے سٹار کھلاڑیوں کا دنیا کے معروف سٹار کھلاڑیوں کے ساتھ مقابلہ ہو گا۔

ریاض سیزن انتظامیہ نے اس میچ کی ایک ممتاز، منفرد اور نمایاں ٹکٹ متعارف کرائی ہےجس پر عام بولی لگائی جائے گی۔

ٹکٹ کی خاص بات یہ ہے کہ اسے حاصل کرنے والا انتہائی اہمیت کا حامل فرد ہو گا، جیتی والی ٹیم کو ٹرافی اور کھلاڑیوں کو میڈل دیتے وقت انٹرٹینمنٹ اتھارٹی کے سربراہ ترکی آل الشیخ کے ساتھ ہو گا اور تمام سٹار کھلاڑیوں سے ملاقات کرے گا۔

ٹکٹ حاصل کرنے والا شخص اپنی پسند کے کھلاڑیوں کے ساتھ خصوصی تصاویر لے گا، ٹیم کے ساتھ خصوصی لنچ میں شرکت کرے گا اور اسے دیگر مراعات بھی دی جائیں گی۔

میچ کی منفرد اور ممتاز ٹکٹ پر عام بولی انٹرٹینمنٹ اتھارٹی کے آفیشل اکاؤنٹ پر شروع ہوئی جس کا افتتاح ترکی آل الشیخ نے 10 لاکھ ریال سے کیا ہے۔

بعد ازاں معرف تاجر عبد العزیز بغلف نے 22 لاکھ ریال کی بولی لگائی  اور کچھ دیر بعد اس پر 5 لاکھ ریال کا اضافہ کرکے قیمت کو 30 لاکھ ریال تک پہنچا دیا۔

واضح رہے کہ ٹکٹ کی پوری قیمت احسان خیراتی ادارے کو عطیہ کی جائے گی جو ملک میں مختلف فلاحی کاموں میں مصروف ہے۔

یاد رہے کہ ٹکٹ پر بولی 17 جنوری تک لگائی جاسکتی ہے جبکہ فٹبال میچ 19 جنوری کو منعقد ہوگا۔