اماراتی صدر سے رومانیہ کے صدر کی ملاقات، متعدد معاہدوں پر دستخط

متحدہ عرب امارات کے صدر شیخ محمد بن زاید آل نہیان سے پیر کو ابوظبی میں رومانیہ کے صدر نے ملاقات کی ہے۔

اماراتی صدر نے ابوظبی کے الوطن پیلس میں ہونے والے سرکاری مذاکرات کے آغاز میں رومانیہ کے صدر کا خیر مقدم کرتے ہوئے کہا کہ اس دورے سے دونوں ملکوں کے تعلقات کو نئی تحریک ملے گی۔

امارات کی سرکاری خبررساں ایجنسی وام کے مطابق ملاقات میں دونوں ملکوں کی دلچسپی کے متعدد مسائل اور موضوعات پربھی بات چیت کی گئی۔

دونوں دوست ملکوں کے درمیان تعاون کے تعلقات اور تمام شعبوں میں انہیں فروغ دینے کے طریقوں پر تبادلہ خیال کیا گیا۔

فریقین نے دونوں ملکوں کے اہم ترقیاتی شعبوں خصوصااقتصادی، تجارتی، تجددپذیر توانائی اور فوڈ سیکیورٹی جیسے شعبوں میں تعاون کے فروغ کے نئے امکانات کا جائزہ لیا۔

دونوں ملکوں میں مشترکہ سرمایہ کاری کو آگے بڑھانے او اس حوالے سے نئے دروازے کھولنے کے امکانات بھی زیر بحث آئے۔

 باہمی دلچسپی کے علاقائی و بین الاقوامی امور و مسائل کا جائزہ اوراس حوالےسے نقطہ ہائے نظر کا تبادلہ کیا گیا۔

شیخ محمد بن زاید آل نہیان نے کہا کہ’ امارات اور رومانیہ کے تعلقات دیرینہ ہیں۔ان کی تاریخ  امارات کے قیام کے ابتدائی دور تک جاتی ہے۔ دونوں ملک مختلف سطحوں پر مسلسل رابطے میں ہیں‘۔

انہوں نے کہا کہ ’موسمیاتی تبدیلی کے حوالے سے امارات اور رومانیہ نے 2050 تک جو ہدف مقرر کیے ہوئے ہیں وہ ایک جیسے ہیں‘۔ 

اماراتی صدرکا کہنا تھا کہ ’امارات موسمیاتی تبدیلی سے متعلق اقوام متحدہ کے معاہدے ’کوپ 28‘ کانفرنس میں رومانیہ کی موثر شرکت کا آرزو مند ہے‘۔

رومانیہ کے صدر نے شاندار استقبال اور فیاضانہ میزبانی پر اماراتی صدر کا شکریہ ادا کیا۔ 

انہوں نےکہا کہ ’امارات پائدار ترقی کے حوالےسے پورے علاقے کے لیے مثال بن چکا ہے‘۔ 

اس موقع پر متعدد معاہدوں اور مفاہمتی یادداشتوں پر دستخط  بھی کئے گئے۔

امارات اوررومانیہ نے توانائی اور بنیادی ڈھانچے، تعلیم و تربیت، سائبر سیکیورٹی، ایٹمی توانائی وغیرہ کے شعبوں میں مفاہمتی یادداشتوں اور معاہدوں پر دستخط کیے ہیں۔

علاوہ ازیں شیخ محمد بن زاید آل نہیان نے ٹویٹ میں کہا’ آج رومانیہ کے صدر سے ملاقات کی تاکہ دونوں ملکوں کے درمیان تعلقات کو مزید مضبوط اورانہیں مزید ترقی دینے کے طریقے تلاش کیے جا سکیں۔ ہماری موجودگی منیں امارات اور رومانیہ کے درمیان تعاون کو بڑھانے کے لیے کئی معاہدوں پر دستخط بھی ہوئے‘۔