ساجد علی سدپارہ نے اضافی آکسیجن کے بغیر ’خطرناک ترین‘ چوٹی سر کر لی

پاکستانی کوہ پیما ساجد علی سدپارہ نے نیپال میں دنیا کی دسویں بڑی پہاڑی چوٹی اناپورنا اضافی آکسیجن کے بغیر سر کر لی ہے۔ 

عرب نیوز کے مطابق اناپورنا کی سطح سمندر سے بلندی آٹھ ہزار 91 میٹر ہے جسے سر کرنا بہت مشکل سمجھا جاتا ہے۔ اس کو سر کرتے ہوئے اب تک 60 افراد کی جان جا چکی ہے۔

ساجد علی سدپارہ پاکستانی کوہ پیما محمد علی سدپارہ کے بیٹے ہیں جن کی 2021 کے موسم سرما میں کے ٹو سر کرنے کے دوران موت ہو گئی تھی۔

ساجد علی سدپارہ اس سے قبل دو مرتبہ کے ٹو اور نیپال میں مناسلو کی چوٹی سر کر چکے ہیں۔ اس کے علاوہ اضافی آکسیجن کے بغیر وہ گیشربرن 1 اور گیشربرن 2 کی چوٹیاں بھی سر کر چکے ہیں۔

الپنائن کلب آف پاکستان کے قرار حیدری نے ساجد علی سدپارہ اور ان کی ٹیم کو اناپورنا چوٹی سر کرنے پر مبارکباد دی۔ انہوں نے کہا کہ ’یہ بہت خوشی کی بات ہے کہ ساجد علی سدپارہ نے دنیا کی خطرناک ترین چوٹیوں میں سے ایک کو سر کیا ہے۔‘

’یہ بہت مشکل کام تھا کیونکہ وہ لیڈ کر رہے تھے اور سخت ترین موسم کے باوجود سے سر کیا۔ ساجد ایک نوجوان کوہ پیما ہیں اور ان کا خواب ہے دنیا کی تمام بڑی چوٹیاں سر کی جائیں۔ یہ ان کے والد کا خواب تھا جو ادھورا رہ گیا۔‘

نیپالی کوہ پیما چنگ داوا سرپا نے بھی انہیں مبارکباد دیتے ہوئے کہا کہ ’جاگو پاکستانیو! لیجنڈ علی سدپارہ کے بیٹے ساجد علی سدپارہ نے اناپورنا کی چوٹی سر کر لی ہے اور وہ بھی اضافی آکسیجن کے بغیر۔‘