انڈین کرکٹ ٹیم کا 14میچوں میں لگاتار ٹاس ہارنے کا نیا ریکارڈ

انڈین کرکٹ ٹیم نے لگاتار 14 ون ڈے میچوں میں ٹاس ہارنے کا نیا ریکارڈ قائم کر دیا ہے۔

 آئی سی سی چیمپئنز ٹرافی کے پہلے سیمی فائنل میں انڈین ٹیم نے آسٹریلیا کے خلاف میچ تو جیت لیا لیکن ٹیم ٹاس ایک مرتبہ پھر سے ہار گئی۔

اس طرح کپتان روہت شرما نے لگاتار 11 مرتبہ بطور کپتان ٹاس ہارنے کا ریکارڈ بھی بنا لیا جبکہ ٹیم نے بھی 14 لگاتار ٹاس ہارنے کا ریکارڈ بھی اپنے نام کر لیا۔

حیران کن طور پر انڈین ٹیم کی ٹاس ہارنے کی سٹریک 2023 میں کھیلے گئے ون ڈے ورلڈ کپ فائنل سے شروع ہوئی جو رکنے کا نام ہی نہیں لے رہی۔

آئی سی سی ورلڈ کپ 2023 کے فائنل سمیت انڈین ٹیم نے 14 ون ڈے میچز کھیلے جس میں وہ کسی ایک میچ میں بھی ٹاس جیت نہ سکی۔

چیمپئنز ٹرافی کے سیمی فائنل میں ٹاس ہارنے کے بعد روہت شرما نے کہا کہ ’میں بولنگ اور بیٹنگ دونوں کرنا چاہتا تھا لیکن جب آپ کے دماغ میں دو آپشن ہوں تو بہتر ہے کہ ٹاس ہار جائیں۔‘

خیال رہے کہ بطور کپتان لگاتار سب سے زیادہ ٹاس ہارنے کا ریکارڈ ویسٹ انڈیز کے سابق کپتان برائن لارا کے پاس ہے۔

برائن لارا نے اکتوبر 1998 سے مئی 1999 تک  12 میچوں میں ٹاس ہارے۔

اسی طرح نیدرلینڈز کے سابق کپتان پیٹر بورن نے مارچ 2011 سے اگست 2013 تک 11 ٹاس ہارے۔