بغیر محرم حج پرمٹ کیسے حاصل کریں؟

سعودی وزارت حج و عمرہ نے ’بغیر محرم‘ حج پرمٹ کے اجرا کا طریقہ کار جاری کر دیا ہے۔ 

عاجل ویب سائٹ کے مطابق سعودی وزارت کا کہنا ہے کہ جو سعودی شہری بغیرمحرم حج پرمٹ جاری کرانا چاہتے ہوں وہ وزارت داخلہ کے ماتحت محکمہ احوال مدنیہ (سول افیئرز ڈپارٹمنٹ) سے رجوع کریں پھر آن لائن درخواست سیکشن کا انتخاب کریں اس کے بعد حاجی کے ہمسفر (مرافق) کا تعین کریں۔ ہمراہ کے رشتے کی نشاندہی کریں۔  

وزارت حج و عمرہ کا کہنا ہے کہ مقیم غیرملکی محکمہ پاسپورٹ (جوازات) سے رجوع کریں گے۔ 

وزارت حج و عمرہ  نے توجہ دلائی ہے کہ حج پرمٹ 1444ھ کا اجرا پندرہ شوال مطابق 5 مئی 2023 سے شروع ہوگا۔ حج پرمٹ اسی وقت جاری ہوگا جب امیدوار مقررہ ویکسین لے چکا ہوگا۔ 

وزارت حج و عمرہ کا کہنا ہے کہ ویکسین لینے کی آخری تاریخ حج موسم شروع ہونے سے دس دن قبل تک کی ہے۔