چترال: طالب علم کا بنایا مارخور کا مجسمہ بلند ترین سیاحتی مقام پر نصب

خیبر پختونخوا کے ضلع لوئر چترال میں لواری ٹنل سے داخل ہوتے ہی بلند ترین مقام پر قومی جانور مارخور کا مجسمہ نصب کر دیا گیا ہے۔ اس مقام کی اونچائی 12 ہزار فٹ ہے۔

مجسمے کو ٹورسٹ فیسلیٹیشن سینٹر کے قریب نصب کیا گیا ہے جہاں سیاحوں کا قیام ہوتا ہے۔

مارخور کا مجسمہ کس نے بنایا؟

مارخور کا مجسمہ حکومت یا محکمہ سیاحت نے نہیں بلکہ ایک طالب علم نے تیار کیا یے جس کا تعلق عشریت چترال سے ہے۔

نوجوان فضل واحد نے اردو نیوز کو بتایا کہ یہ مجسمہ 50 ہزار روپے کی لاگت میں بنایا گیا جس کی تیاری میں 22 دن لگے۔ مجسمے میں سریا اور سمینٹ کا استعمال کیا گیا ہے۔

فضل واحد کا کہنا تھا کہ قومی جانور مارخور کا مجسمہ بنانے کا مقصد امن اور محبت کا پیغام دینا ہے، یہ جانور چترال میں پایا جاتا ہے اور ہم اس مجسمے کے ذریعے سیاحوں کو خوش آمدید کہہ رہے ہیں۔

انہوں نے کہا کہ مارخور مجسمے کو دیکھ کر سیاح بھی خوش ہوتے ہیں اور انہیں اس جانور کے بارے میں جاننے کا موقع بھی مل جاتا ہے۔

نوجوان آرٹسٹ  کے مطابق وہ کاغذ پر پورٹریٹ وغیرہ بناتے تھے مگر پہلی بار انہوں نے مجسمہ بنایا ہے۔

مارخور کا مجسمہ بنانے پر ایس ایچ او تھانہ عشریت نے حوصلہ افزائی کے لیے نوجوان کو نقد انعام دیا۔