ٹیزر میں اداکار رنویر سنگھ اور اداکارہ عالیہ بھٹ کے درمیان رمانوی اور جذباتی مناظر بھی ہیں۔
فلم میں رنویر سنگھ، عالیہ بھٹ کے علاوہ لیجنڈری اداکار دھرمندر، جیا بچن اور شبانہ عظمی کو بھی دیکھا جا سکتا ہے۔
ٹیزر سے یہ ایک فیملی ڈرامہ فلم لگ رہی ہے۔ اس میں کرن جوہر کی مخصوص ہدایتکاری کی جھلک بھی دیکھی جا سکتی ہے جس میں بڑے سیٹ، رنگ اور خوبصورت لوکیشن شامل ہیں۔
راکی اور رانی کی پریم کہانی کے ٹیزر میں گلوکار ارجیت سنگھ کی آواز میں گانا ’تم کیا ملے‘ بھی ہے۔
یہ فلم 28 جولائی کو انڈیا سمیت دنیا بھر کے سنیما گھروں میں ریلیز کی جائے گی۔
منگل کے روز فوٹو اینڈ ویڈیو شیئرنگ پلیٹ فارم انسٹاگرام پر رنویر سنگھ نے اپنی پوسٹ میں لکھا کہ ’جذبات، ڈرامہ، پَری وار (خاندان) اور اس سب سے اُوپر پیار۔ آپ کے سامنے پیش کر رہے ہیں ’پریم کہانی‘ کی پہلی جھلک جس سے پیار کا نیا دور شروع ہو رہا ہے۔‘
خیال رہے کرن جوہر کا شمار بالی وُڈ کے اُن ہدایتکاروں میں ہوتا ہے جن کی اب تک تمام فلمیں کامیاب رہی ہیں۔
