لڑکھڑاتی بیٹنگ لائن اپ کو سلمان اور سعود کا سہارا، پاکستان کے پانچ وکٹوں پر 221 رنز

پاکستان اور سری لنکا کے درمیان دو ٹیسٹ میچز کی سیریز کے پہلے میچ کے دوسرے دن پاکستان نے اپنی پہلی اننگز میں پانچ وکٹوں کے نقصان پر 221 رنز بنا لیے ہیں۔

پیر کو گال میں دوسرے دن کا کھیل ختم ہونے پر پاکستان کو سری لنکا کی پہلی اننگز کا خسارہ ختم کرنے کے لیے مزید 91 رنز درکار ہیں۔

پہلی اننگز میں پاکستان کی جانب سے سعود شکیل 69 اور آغا سلمان 61 رنز بنا کر ناٹ آؤٹ ہیں جبکہ شان مسعود نے 39 اور عبد اللہ شفیق نے 19 رنز سکور کیے۔

سری لنکا کی طرف سے بولنگ کرتے ہوئے پربھات جےسوریا نے تین جبکہ رمیش مینڈس اور کاسُن راجیتھا نے ایک ایک وکٹ حاصل کی۔

اگر پاکستان کی پہلی اننگز کی بات کی جائے تو اس میں گرین شرٹس کا آغاز مایوس کن رہا۔

سری لنکا کو پہلی کامیابی امام الحق کی وکٹ کی صورت میں ملی جب وہ ایک رن کے انفرادی سکور پر کاسُن راجیتھا کی گیند پر آؤٹ ہوگئے۔

اس کے بعد اوپنر عبد اللہ شفیق اور شان مسعود کے درمیان مختصر شراکت دیکھنے میں آئی، تاہم ٹیم کے 47 رنز پر عبد اللہ شفیق پربھات جےسوریا کی گیند پر سلپ میں کیچ آؤٹ ہو گئے۔

دوسری وکٹ گرنے کے بعد شان مسعود نے تیز کھیلنے کی کوشش کی، تاہم وہ 39 کے انفرادی سکور پر رمیش مینڈس کی گیند پر ایل بی ڈبلیو آؤٹ ہوگئے جبکہ کپتان بابر اعظم بھی پہلی اننگز میں بڑا سکور کرنے میں ناکام رہے اور وہ بھی صرف 13 رنز پر جےسوریا کی گیند پر پویلین لوٹ گئے۔

بابر اعظم کے آؤٹ ہونے کے بعد وکٹ کیپر بیٹر سرفراز احمد اور سعود شکیل میں 28 رنز کی شراکت دیکھنے میں آئی جس کے بعد سرفراز احمد سویپ شاٹ کھیلنے کی ناکام کوشش میں پربھات جےسوریا کی گیند پر ایل بی ڈبیلو آؤٹ ہوگئے۔

سرفراز احمد کے آؤٹ ہونے کے بعد چھٹی وکٹ کے لیے سعود شکیل اور آغا سلمان کی جانب سے 148 گیندوں پر 120 رنز کی شراکت دیکھنے میں آئی جس نے پاکستان کو میچ میں واپس لا کھڑا کیا۔

دوسرے دن کا کھیل بھی بارش سے متاثر ہوتا رہا جس کے بعد پیر کے روز میچ کو وقت سے پہلے ختم کرنا پڑا۔

اس سے قبل سری لنکا نے دوسرے دن پہلی اننگز کو 242 رنز سے شروع کیا۔

سری لنکا کی جانب سے دھننجایا ڈی سلوا نے سینچری بناتے ہوئے 122 رنز سکور کیے جس کے بعد پوری میزبان ٹیم 312 رنز پر آؤٹ ہوگئی۔

سری لنکا کی جانب سے پہلی اننگز میں دھننجایا ڈی سلوا کے علاوہ انجیلو میتھیوز نے 64 اور وکٹ کیپر بیٹر سدیرا سمارا وِکاراما نے 36 رنز بنائے۔

پاکستان کی طرف سے بولنگ کرتے ہوئے شاہین شاہ آفریدی، نسیم شاہ، ابرار احمد نے تین تین جبکہ آغا سلمان نے ایک وکٹ حاصل کی۔

سری لنکا کے خلاف آغا سلمان اور سعود شکیل کی شاندار شراکت پر سماجی رابطوں کی ویب سائٹ ٹوئٹر پر بھی کرکٹ شائقین کی جانب سے تبصرے کیے جا رہے ہیں۔

ٹوئٹر ہینڈل کرک کریٹک نے اپنی ٹویٹ میں لکھا کہ ’جب آغا نے پچھلی مرتبہ سری لنکا کا دورہ کیا تھا وہ گبھرائے ہوئے تھے اور جب وہ سری لنکا میں ڈھل گئے تو ٹور ختم ہو گیا تھا۔ اب کی بار وہ تیار ہیں اور انہیں سپن بولنگ کے خلاف بیٹنگ کرتے دیکھ کر بہت مزہ آتا ہے۔ ہائی کوالٹی کی لڑائی جاری ہے۔‘

نواز نے اپنی ٹویٹ میں لکھا کہ ’تمام نظریں سعود شکیل اور آغا سلمان پر ہیں۔‘

 صحافی شاہد ہاشمی کہتے ہیں کہ ’سعود شکیل اور آغا سلمان شاندار بیٹنگ کر رہے ہیں اور وہ بھی صورتحال کے مطابق۔ ضرور سینچریاں بنائیں اور پاکستان اچھی برتری دیں۔‘

زین انصاری نے مزاحیہ انداز میں کہا کہ ’بیزبال یہ، بیز بال وہ، صرف ایک بال ہونی چاہیے اور وہ ہے شیک بال (یعنی سعود شکیل بال)۔‘