پاکستان یوکرین کو کسی قسم کے ہتھیار فراہم نہیں کر رہا: وزیر خارجہ

پاکستان کے وزیر خارجہ بلاول بھٹو کا کہنا ہے کہ ’پاکستان یوکرین کو کسی بھی قسم کے جنگی ہتھیار فراہم نہیں کر رہا۔‘

جمعرات کو یوکرین کے وزیر خارجہ دیمیترو کولیبا کے ساتھ مشترکہ پریس کانفرنس کے دوران ایک سوال کا جواب دیتے ہوئے وزیر خارجہ بلاول بھٹو زرداری کا کہنا تھا کہ ’جب سے (یوکرین اور روس) کا تنازع شروع ہوا ہے ہم نے یوکرین کے ساتھ دفاعی سامان کی فراہمی کے کسی معاہدے پر کام نہیں کیا۔‘

بلاول بھٹو زرداری کا مزید کہنا تھا کہ ’پاکستان نے دونوں ممالک کے درمیان تنازع میں ’اصولی مؤقف‘ اپنایا ہوا ہے اور غیر جانبداری کا مظاہرہ کیا ہے۔‘

بلاول بھٹو زرداری کی جانب سے یوکرین کو اسلحہٰ فراہم کرنے کی تردید ایک ایسے وقت میں سامنے آئی ہے جب میڈیا میں یہ اطلاعات چل رہی تھیں کہ پاکستان یوکرین کو دفاعی سامان مہیا کر رہا ہے۔

یوکرین کے وزیر خارجہ نے بھی مشترکہ پریس کانفرنس کے دوران پاکستانی وزیر خارجہ کے بیان کی تصدیق کی۔

روس اور یوکرین کے درمیان جاری تنازع کی وجہ سے بحیرہ اسود کے ذریعے یوکرین سے دیگر ممالک کے لیے گندم کی فراہمی رُک جانے کے حوالے سے وزیر خارجہ بلاول بھٹو زرداری کا کہنا تھا کہ ’یہ صرف ہمارے مفاد میں نہیں بلکہ ترقی پذیر دنیا کے مفاد میں بھی ہے کہ بلیک سی گرین انیشیٹو بحال کیا جائے۔‘

پاکستانی وزیر خارجہ کا مزید کہنا تھا کہ گندم کی فراہمی رُک جانے حوالے سے ’میں خود اقوام متحدہ کے سیکریٹری جنرل اور ترکیہ اور روس کے وزرائے خارجہ سے پاکستان کے خدشات پر بات چیت کروں گا۔‘

یوکرین کے وزیر خارجہ دیمیترو کولیبا نے پریس کانفرنس کے دوران یہ بھی کہا کہ ’وہ انسانی ہمدردی بنیاد پر یوکرین کے لیے پاکستان کی مدد پر شکر گزار ہیں۔‘

دیمیترو کولیبا کا کہنا تھا کہ ’ہمیں معلوم ہے کہ پاکستان ہماری علاقائی سالمیت کی حمایت کرتا ہے اور باقی یہ پاکستانی حکومت کا فیصلہ ہے کہ کس طرح سے ہمارے ملک کی حمایت جاری رکھتا ہے جو کہ اپنی خود مختاری کے لیے خود سے مضبوط پڑوسی سے لڑ رہا ہے۔‘