شاہد آفریدی اور اداکار سنیل شیٹی کی امریکہ میں ملاقات

کرکٹ اور بالی ووڈ کے سٹارز جب کبھی ایک ساتھ نظر آئے ہیں تو انہوں نے مداحوں کی توجہ ضرور حاصل کی ہے اور جب یہ دونوں سٹارز پاکستان اور انڈیا سے تعلق رکھتے ہوں تو سمجھ لیجیے کہ مداح بھی کسی نہ کسی طور پر ایسی ملاقات کا حصہ بن جاتے ہیں۔ 

ایک ایسی ہی ملاقات کی ویڈیو سوشل میڈیا پر وائرل ہوئی ہے جس میں پاکستانی کرکٹ کے سٹار شاہد آفریدی اور بالی وڈ کے ایکشن ہیرو سنیل شیٹی ایک ساتھ دکھائی دے رہے ہیں۔

قومی ٹیم کے سابق کپتان شاہد آفریدی دنیائے کرکٹ کے ان چند کھلاڑیوں میں شامل ہیں جو ریٹائرمنٹ کے بعد بھی میڈیا اور مداحوں کی توجہ کا مرکز ہیں۔ ان کی بلے بازی کے جارحانہ انداز نے ان کو دنیا بھر میں شہرت دلائی۔

بالی ووڈ سٹار سنیل شیٹی اس وقت مقبولیت حاصل کرچکے تھے جب شاہد آفریدی نے عالمی کرکٹ کھیلنے کا آغاز کیا۔ وہ بھی کرکٹ میں دلچسپی رکھتے ہیں اور سیلیبریٹی کرکٹ لیگ میں ممبئی ہیروز ٹیم کے کپتان ہیں۔ کرکٹ سے ان کا لگائو کسی سے ڈھکا چھپا نہیں۔

مزید پڑھیں

Masha'Allah Sweet lala with Bollywood actor Sunil Shetty in Miami Florida ❤️@SAfridiOfficial @SunielVShetty #shahidafridi #sunielshetty #UsMaatersT10 pic.twitter.com/lnYhcwohve

کرکٹ کے ان دونوں ستاروں کی امریکا کے ایک ریستوران میں ہونے والی ملاقات کی ویڈیو سوشل میڈیا پر وائرل ہوئی تو صارفین کی جانب سے اس پر خوشی اور حیرت کے ملے جلے جذبات کا اظہار کیا گیا۔

مختلف سوشل میڈیا پلیٹ فارمز پر وائرل ہونے والی اس ویڈیو کو اب تک لاکھوں ویوز مل چکے ہیں۔

ویڈیو میں قومی ٹیم کے سابق کپتان شاہد آفریدی اور بالی ووڈ سٹار سنیل شیٹی کو خوشگوار ماحول میں گپیں مارتے ہوئے دیکھا جا سکتا ہے، مثال کے طور پر شاہد آفریدی سنیل شیٹی سے کہہ رہے ہیں، ‘آپ کو ٹی وی پر دیکھا ہے۔’

سابق کپتان شاہد آفریدی نے اس ملاقات میں اپنی بیٹیوں کو بھی سنیل شیٹی سے متعارف کروایا۔

پاکستان اور بھارت کے سوشل میڈیا صارفین کے علاوہ دنیا بھر میں دونوں سٹارز کے چاہنے والوں نے اس ویڈیو پر خوشی کا اظہار کیا ہے اور وہ اس  پر دلچسپ تبصرے کر رہے ہیں۔