ایک کروڑ سے زائد پاکستانی ٹک ٹاک ویڈیوز ڈیلیٹ کیوں؟

سوشل میڈیا ایپ ٹک ٹاک نے  ’کمیونٹی گائیڈ لائنز‘ کی خلاف ورزی پر پاکستان سمیت دنیا بھر کی مجموعی طور پر 10 کروڑ 50 لاکھ سے زائد ویڈیوز ڈیلیٹ کر دی ہیں۔

جمعرات کو ٹک ٹاک نے 2023 کی دوسری سہ ماہی اپریل سے جون تک غلط معلومات سے نمٹنے اور پلیٹ فارم کو محفوظ  بنانے کے لیے  کمیونٹی گائیڈلائنز کے نفاذ کی رپورٹ جاری کی۔

رپورٹ کے مطابق 2023 کے دوران پاکستان میں کمیونٹی گائیڈ لائنز کی خلاف ورزی کرنے پر ایک کروڑ 41 لاکھ سے زائد ویڈیوز ڈیلیٹ کی گئیں۔

بین الاقوامی سطح پر ٹک ٹاک نوجوان صارفین کے تحفظ کو ترجیح دیتے ہوئے 13 سال سے کم عمر افراد کے ایک کروڑ 88 لاکھ سے زائد اکاؤنٹس ڈیلیٹ کیے گئے ہیں۔

ڈیلیٹ کی گئی  ویڈیوز میں سے 66,440,775 خود کار نظام  کے ذریعے حذف کی گئیں جبکہ 6,750,002 ویڈیوز کو ریویو کر کے ہٹایا گیا۔

ٹک ٹاک سے ڈیلیٹ کی گئی ویڈیوز پلیٹ فارم پر موجود کل ویڈیوز کا سات فیصد ہے۔ 

’کمیونٹی گائیڈ لائنز‘ کی خلاف ورزیوں سے نمٹنے کے علاوہ ٹک ٹاک  نے فیک اکاؤنٹس اور یوزر کی جانب سے اپلوڈ کیے جانے والے مواد کا بھی جائزہ لینے کا فیصلہ کیا ہے۔

ٹک ٹاک پر خودکار طریقے سے جعلی اکاؤنٹس میں اضافے کو روکنے کے لیے بھی احتیاطی اقدامات کیے گئے ہیں۔

ٹک ٹاک کے مطابق پاکستان میں خلاف ورزی کرنے والی 86.6  فیصد ویڈیوز کو ویوز ملنے سے قبل ہی ڈیلیٹ کر دیا گیا۔ 

ٹک ٹاک کا کہنا ہے کہ ’کمیونٹی گائیڈ لائنز کو تمام صارفین کے لیے ایک محفوظ، جامع اور مستند تجربے کو فروغ دینے کے لیے تیار کیا گیا ہے۔ ٹک ٹاک جدید ٹیکنالوجی سے خلاف ورزی کرنے والے کانٹینٹ کی نشاندہی کر سکے گا۔‘