ورلڈ کپ سیمی فائنلز میں نیوزی لینڈ کا انڈیا، آسٹریلیا کا جنوبی افریقہ سے مقابلہ

پاکستان کے ورلڈ کپ سے باہر ہونے کے بعد نیوزی لینڈ کی ٹیم 15 نومبر کو ممبئی میں پہلے سیمی فائنل میں میزبان انڈیا کا مقابلہ کرے گی۔

پاکستان اور انگلینڈ کا میچ کولکتہ کے ایڈن گارڈنز سٹیڈیم میں جاری ہے اور اگر گرین شرٹس یہ میچ جیت بھی جاتے ہیں تو ناقص نیٹ رن ریٹ کے باعث سیمی فائنل کے لیے کوالیفائی نہیں کر سکیں گے۔

سنیچر کو ٹاس جیت کر پہلے بیٹنگ کرتے ہوئے انگلینڈ نے پاکستان کو 338 رنز کا ہدف دیا تھا اور پاکستان کو سیمی فائنل میں کوالیفائی کرنے کے لیے یہ ہدف صرف 6.4 اوورز میں حاصل کرنا تھا جو کہ ناممکن تھا۔

پاکستان کی ناکامی کی صورت میں نیوزی لینڈ نے مسلسل پانچویں مرتبہ ورلڈ کپ کے سیمی فائنل میں جگہ بنا لی ہے۔

سیمی فائنل میں پہنچنے والی دیگر دو ٹیمیں جنوبی افریقہ اور آسٹریلیا 16 نومبر کو کولکتہ کے ایڈن گارڈنز سٹیڈیم میں مدمقابل آئیں گی۔

سیمی فائنل جیتنے والی دونوں ٹیمیں 19 نومبر کو احمدآباد کے نریندر مودی سٹیڈیم میں فائنل کھیلیں گی۔