سعودی وزیرخارجہ سے یورپی یونین کے نمائندے کا رابطہ 

سعودی وزیر خارجہ شہزادہ فیصل بن فرحان سے اتوار کو یورپی یونین  کے نمائندے برائے امور خارجہ جوزف بوریل  نے ٹیلیفون پر رابطہ کیا۔ 

عاجل ویب سائٹ کے مطابق فریقین نے غزہ کی تازہ صورتحال پر تبادلہ خیال کیا۔ 

اس موقع پر سعودی وزیر خارجہ نے غزہ میں انسانی المیے کا سلسلہ جاری رہنے پر گہری تشویش کا اظہار کیا۔ 

سعودی وزیر خارجہ نے کہا کہ غزہ سے فلسطینیوں کی جبری بے دخلی اور غاصب اسرائیلی حکام کے مسلسل حملے بند کرانے کے سلسلے میں عالمی برادری کا کردار بے حد اہم ہے۔ اسرائیلی اقدامات بین الاقوامی قوانین کی کھلی خلاف ورزی ہیں۔ 

سعودی وزیر خارجہ نے زور دیتے ہوئے کہا کہ مقبوضہ فلسطینی علاقوں میں عسکری حملے بند کرانے کے لیے موثر طریقہ کار وضع کرنا اور شہریوں کے تحفظ کا بندوبست کرنا ہوگا۔