مریم نواز نے ایک سال میں 17 غیر ملکی دورے کیے، 74 لاکھ روپے اخراجات آئے: دستاویز

مسلم لیگ ن کی چیف آرگنائزر مریم نواز شریف کے 2022 سے 2023 تک بیرون ممالک دوروں کی تفصیلات سامنے آئی ہیں جن کے مطابق انہوں نے ایک سال کے دوران 17 ممالک کے دورے کیے۔
لاہور کے حلقہ 119 کے لیے جمع کروائے گئے کاغذات نامزدگی کے ساتھ منسلک کی گئی دستاویزات کے مطابق مریم نواز کے بیرون ملک دوروں پر 74 لاکھ 22 ہزار 271 روپے کے اخراجات آئے۔
مریم نواز نے 13 نومبر 2022 سے 30 نومبر 2022 تک سوئٹزرلینڈ میں قیام کیا اور 18 دن قیام کا خرچ 53 ہزار 550 روپے آیا۔

مریم نواز نے برطانیہ کے چار دورے کیے اور 96 دن قیام کیا اور 96 روز میں مریم نواز نے 22 لاکھ 50 ہزار روپے خرچ کیے۔
سعودی عرب کے مریم نواز نے دو دورے کیے اور 32 دن قیام کیا۔ سعودی عرب اور متحدہ عرب امارات میں قیام کے دوران انہوں نے 24 لاکھ 88 ہزار روپے سے زائد رقم خرچ کی۔
مریم نواز نے قطر، سعودی عرب، متحدہ عرب امارات، سوئٹزرلینڈ اور برطانیہ کے دورے کیے۔
مریم نواز کو 2023 میں 6 لاکھ 50 ہزار 695 روپے کی آمدنی ہوئی اور انہوں نے ایک لاکھ 17 ہزار 185 روپے انکم ٹیکس  دیا۔
ذاتی گاڑی نہیں، بھائی کی مقروض‘
اس سے قبل کاغذات نامزدگی کے ساتھ مریم نواز نے اپنے اثاثوں کی تفصیلات بھی دی تھیں۔ اثاثوں کی تفصیلات کے مطابق مریم نواز اپنے بھائی حسن نواز کی 2 کروڑ 89 لاکھ روپے سے زائد کی مقروض ہیں۔
انہوں نے اپنے اثاثوں میں لاہور کے مختلف موضع جات میں 84 کروڑ 25 لاکھ 84  ہزار روپے سے زائد مالیت کی 1500 کنال سے زائد اراضی ظاہر کی ہے۔
مریم نواز شریف نے اثاثوں میں ایک سال کے دوران 40 لاکھ روپے سے زائد کا اضافہ ظاہر کیا ہے۔ الیکشن کمیشن کے پاس جمع تفصیلات کے مطابق مریم نواز کسی گاڑی کی مالک نہیں ہیں۔
مسلم لیگ ن کی سینیئر نائب صدر نے 17 لاکھ 50 ہزار روپے مالیت کا سونا بھی اپنی ملکیت ظاہر کیا ہے۔ ان کے پاس مختلف بینک اکاؤنٹس اور نقد کی صورت میں ایک کروڑ روپے سے زائد کی رقم موجود ہے۔
 مریم نواز نے اثاثوں میں ایک کروڑ 22 لاکھ روپے مالیت کے مختلف کمپنیوں میں 11 لاکھ 20 ہزار شیئرز بھی ظاہر کیے ہیں۔
انہوں نے مسلم لیگ ن کو پارٹی ٹکٹ کے لیے 2 لاکھ روپے کی ادائیگی بھی اپنے کاغذات نامزدگی میں ظاہر کی ہے۔ کاغذات نامزدگی میں مریم نواز شریف نے اپنی تعلیمی قابلیت ایم اے انگلش لٹریچر ظاہر کی ہے۔