رات کو کھانسی اور زکام کی علامات بڑھ کیوں جاتی ہیں؟

موسم سرما میں اکثر نزلہ، زکام اور کھانسی کا عارضہ لاحق ہو جاتا ہے، یہ کوئی غیرمعمولی بات نہیں۔ تاہم رات کو سونے کے لیے بستر پر دراز ہوتے ہی گویا زکام اور کھانسی کا دورہ سا پڑ جاتا ہے۔ 

مسلسل کھانسی سے نیند ہی متاثر نہیں ہوتی بلکہ بے چینی سی محسوس ہونے لگتی ہے جبکہ زکام کے باعث ناک بند ہونے سے سانس لینا مشکل ہو جاتا ہے اور یوں نیند نہ صرف آپ سے کوسوں دور بھاگ جاتی ہے بلکہ گھروالوں کو بھی پریشانی ہوتی ہے۔ 

 سوال یہ پیدا ہوتا ہے کہ رات کے وقت ہی کھانسی کی شدت میں اضافے اور زکام کی وجہ سے ناک کے بند ہونے کی کیفیت کیوں زیادہ ہو جاتی ہے۔ اس حوالے سے بعض مفید گھریلو ٹوٹکے پیش کیے جا رہے ہیں جن پر عمل کرتے ہوئے آپ پرسکون طور پر سو سکیں گے۔ 

قوت مدافعت اور حیاتیاتی نظام

جسم کے افعال فطری طور پر حیاتیاتی گھڑی کے مطابق کام کرتے ہیں۔ شعبہ طب کی ایک ویب سائٹ کا اس حوالے سے کہنا ہے کہ ’قوتِ مدافعت کا انحصار حیاتیاتی نظام پر ہوتا ہے۔ عام طور پر خون کے سفید خلیے رات کے وقت زیادہ متحرک ہوتے ہیں جبکہ رات کو سردی میں بھی اضافہ ہو جاتا ہے جو ان خلیات کی حرکت میں اضافے کا باعث بنتی ہے۔ 

ہارمونز 

ہارمونز کو بھی حیاتیاتی نظام ہی منظم کرتا ہے۔ کورٹیزول ہارمون صبح کے وقت انتہائی عروج پر ہوتا ہے اور دن چڑھنے کے ساتھ ساتھ اس میں کمی ہونے لگتی ہے۔ 

کورٹیزول ہارمون اور سوزش کے درمیان انتہائی پیچیدہ تعلق ہوتا ہے جس کی وجہ سے سوزش میں اضافہ اور کمی ہوتی ہے۔ سرد موسم بھی اس کمی و زیادتی کی وجہ ہوتی ہے۔ 

رات کوجسمانی حرارت میں اضافہ

کوئی کسی بھی عارضے میں مبتلا نہ بھی ہو تو بھی جسمانی درجہ حرارت رات کے وقت بڑھ جاتا ہے جس کی وجہ مدافعتی نظام کا زیادہ متحرک ہونا ہے۔ آپ اس وجہ سے یہ محسوس کرتے ہیں کہ جسم کا درجہ حرارت بڑھ رہا ہے۔ 

جسمانی پوزیشن

اسی طرح آپ جب بستر پر سیدھے لیٹے ہوں تو اس صورت میں ناک میں جمع ہونے والی بلغم سانس کی نالی میں جمع ہونے لگیتی ہے جس کی وجہ سے ناک بند ہو جاتا ہے اور سانس لینے میں دشواری کا سامنا کرنا پڑتا ہے۔ 

فراغت

عام طور پر لوگ دن کے وقت روز مرہ کے امور میں مشغول ہوتے ہیں جس کی وجہ سے موسمی نزلہ زکام کے اثرات اتنے زیادہ ظاہر نہیں ہوتے مگر جیسے ہی رات کو سونے کے لیے پرسکون ماحول میں گرم بستر پردراز ہوتے ہیں تو زکام کا حملہ بتدریج شدید ہونے لگتا ہے۔ 

رات کو کھانسی میں اضافہ کیوں؟ 

سوال یہ بھی پیدا ہوتا ہے کہ کھانسی، نزلہ اور زکام کا حملہ رات کے وقت ہی کیوں زیادہ شدید ہوتا ہے؟ اس کی وجوہات یہ ہیں۔

دن کے وقت عام طور پر انسان حرکت میں رہتا ہے جبکہ اس کے برعکس رات کے وقت وہ سکون سے بستر پر دراز ہوتا ہے جس کی وجہ سے ناک میں جمع ہونے والا بلغم حلق میں گرتا ہے جس سے کھانسی ہونے لگتی ہے۔ 

رات کو سانس کی نالیوں کا سکڑنا

رات کے وقت پھیپھڑے عام طور پر زکام سے زیادہ متاثر ہوتے ہیں جس کی وجہ سے سانس کی نالیاں قدرے سکڑ جاتی ہیں اور سانس لینے میں دشواری محسوس ہونے لگتی ہے۔ اس سے دمہ میں مبتلا افراد زیادہ متاثر ہوتے ہیں۔ 

الرجی پیدا کرنے والی اشیا

بعض افراد کو مخصوص چیزوں سے الرجی ہوتی ہے جیسا کہ مخصوص خوشبو یا بو، دھواں یا گرد وغیرہ جس کی وجہ سے انہیں رات کو کھانسی کی شدت میں اضافے کی شکایت ہوتی ہے۔ 

نزلہ زکام میں رات کو پرسکون نیند کیسے لی جائے؟ 

یہ درست ہے کہ رات کے وقت سردی کی علامات میں اضافے سے نیند متاثر ہوتی ہے اور نیند اگر پوری نہ ہو تو صحت خراب ہونے کا خدشہ ہوتا ہے جس سے قوت مدافعت متاثر ہوتی ہے۔ اس حوالے سے بعض اہم نکات ذیل میں پیش کیے جارہے ہیں جن پر عمل کرتے ہوئے نزلہ و زکام میں بھی پرسکون نیند لی جا سکتی ہے۔ 

گرم پانی سے نہائیں

سونے سے قبل کوشش کریں کہ نیم گرم پانی سے غسل کرلیں جس سے جسم کے پٹھوں کو آرام ملتا ہے علاوہ ازیں سونے سے قبل اسٹیم لینے کا بندوبست کرلیں جس سے ناک اور حلق کی نالیاں کھل جاتی ہیں۔ 

شہد کا استعمال

ماہرین غذا کا کہنا ہے کہ یہ بات مشاہدے میں آئی ہے کہ سونے سے قبل ایک چمچ شہد کھانے سے کھانسی کی شدت میں کمی آتی ہے تاہم شہد میں کالی مرچ کا پاؤڈر چھڑک لینا بھی مفید ثابت ہوسکتا ہے۔ 

سر اور گردن کو بلند رکھیں

نزلہ، زکام اور کھانسی کے دوران جب ہم رات کو سونے کے لیے دراز ہوتے ہیں تو ہوتا یہ ہے کہ حلق کے زیریں حصے میں زکام کے اثرات گرنے سے ناک بند ہونے لگتی ہے جو کھانسی اور نظام تنفس کو متاثر کرنے کا باعث ثابت ہوتا ہے۔ 

اس کے تدارک کے لیے بہتر ہے کہ سر کو قدرے بلند کر لیا جائے۔ کھانسی اگر شدید ہونے لگے تو اٹھ کر تھوڑی دیر کے لیے بیٹھ جائیں یا تکیہ اونچا کر لیں۔ 

گرم مشروبات

موسم سرما میں نزلہ زکام اور کھانسی کے لیے عام طور پر گھریلو ٹوٹکوں کے لیے گرم مشروبات استعمال کیے جاتے ہیں جن میں مرغی کی یخنی، چائے اور اسی قسم کی اشیا کا استعمال مفید ثابت ہوتا ہے۔ 

اسی طرح بازار میں نزلہ زکام کی ادویات بھی دستیاب ہیں وہ بھی ڈاکٹر کے مشورے سے استعمال کی جا سکتی ہیں۔