لاہور این اے 130: ’الیکشن کمیشن کی ویب سائٹ سے فارم 47 ’غائب‘

الیکشن کمیشن آف پاکستان نے لاہور کے حلقہ این اے 130 کے نتائج کا فارم 47  اپنی ویب سائٹ سے ہٹا دیا ہے۔

حلقہ این اے 130 کا فارم 47 ویب سائٹ پر اپ لوڈ کیا گیا تھا جس کے مطابق نواز شریف کامیاب قرار دیے گئے تھے اور تحریک انصاف کی حمایت یافتہ آزاد امیدوار ڈاکٹر یاسمین راشد دوسرے نمبر پر تھیں۔

مائیکرو بلاگنگ ویب سائٹ ایکس (سابق ٹوئٹر) پر اس وقت الفاظ ’فارم 47‘ اور ’فارم 45‘  ٹاپ ٹرینڈز کا حصہ بنے ہوئے ہیں اور سوشل میڈیا صارفین حلقہ این اے 130 میں ووٹوں کی گنتی پر تنقید کرتے دکھائی دے رہے ہیں۔

ایک صارف نے دونوں فارمز کی تصویر اپنے ایکس اکاؤنٹ پر پوسٹ کرتے ہوئے لکھا ’ میرے پاس حلقہ این اے 130 کے پولنگ سٹیشن کے فارم 45 میں جماعت اسلامی اور پیپلز پارٹی کے امیدواروں کے 16 اور 7 ووٹ ہیں جبکہ ان کے ووٹ فارم 47 میں کہیں نہیں ہیں۔‘

احسن راجہ نے اپنی پوسٹ میں لکھا ’وقت بدل دیا، جذبات بدل دیے، سکون کریں پاکستان میں کچھ بھی ہو سکتا ہے۔‘

ایک اور صارف نے اپنی پوسٹ میں لکھا ’این اے 130 میاں نواز شریف بمقابلہ یاسمین راشد، فارم 47 پر ایک سرسری نظر آپ کو کئی سوالات کے ساتھ چھوڑ دے گی۔ کیا دوسرے امیدواروں اور ان کے خاندان کے افراد نے الیکشن 2024 میں اپنے لیے ایک ووٹ بھی نہیں ڈالا؟‘

فارم 45 اور 47 ہوتے کیا ہیں؟

فارم 45 کو عام طور پر ’رزلٹ آف دی کاؤنٹ‘ کہا جاتا ہے، اس فارم میں پولنگ سٹیشن کا نمبر، حلقے کا نام، رجسٹرڈ ووٹرز کی تعداد، ڈالے گئے ووٹوں کی کل تعداد اور ہر امیدوار کے حاصل کردہ ووٹوں کی تفصیل شامل ہوتی ہے۔ پریزائڈنگ افسران اس فارم کو ریٹرننگ افسر کو ارسال کرتے ہیں۔ امیدوار پولنگ سٹیشن سے فارم 45 کے ذریعے حاصل کردہ ووٹوں کی تعداد گن سکتے ہیں۔

فارم 47 میں انتخابی حلقے کے غیر مصدقہ نتائج کے بارے میں معلومات ہوتی ہے، اس فارم میں ڈالے گئے اور منسوخ کیے گئے ووٹوں کی تعداد بھی شامل ہوتی ہے۔