پی آئی اے فیصل آباد اور کوئٹہ سے براہ راست عمرہ پروازیں شروع کرے گی

پاکستان کی قومی ایئر لائن  پی آئی اے نے کوئٹہ اور فیصل اباد سے عمرے کے خواہشمند افراد کے لیے  براہ راست پروازوں کا اعلان کیا ہے۔

جمعرات کو  پی آئی اے کی جانب سے جاری بیان میں کہا گیا ہے کہ 6 اگست سے فیصل آباد اور کوئٹہ سے عمرے کے لیے  براہ راست پروازیں چلائی جائیں گی۔

 فلائٹ آپریشن ہفتہ وار 2،2  پروازوں پر مشتمل ہو گا۔

اس سے پہلے جمعرات کو ہی گورنر بلوچستان جعفرخان مندوخیل کی جانب سے جاری ہونے والے بیان میں کہا گیا تھا کہ انھوں نے وزیراعظم پاکستان میاں شہباز شریف کے کوئٹہ کے حالیہ دورے کے موقع پر ون ٹو ون ملاقات کے دوران صوبے کے عوام کے اس دیرینہ مطالبہ کو سامنے رکھا جس پر وزیراعظم نے انھیں یقین دلایا کہ بلوچستان کے عوام کو عنقریب کوئٹہ ٹو سعودی عرب عمرہ فلائٹ شروع کرنے کی خوشخبری سنائیں گے۔

گورنر بلوچستان نے کہا کہ عمرہ کی ادائیگی کے لیے کوئٹہ سے براہ راست فلائٹ کے آغاز سے بلوچستان کے زائرین آئندہ اسلام آباد، کراچی یا لاہور وغیرہ جانے کی تکالیف اٹھانے سے بچ جائیں گے اور اب ان کا قیمتی وقت، توانائی اور پیسہ ضائع نہیں ہو گا۔

یہ پروازیں اب ہر منگل اور جمعے کو کوئٹہ سے سعودی عرب کے شہر جدہ براہ راست آپریٹ کریں گی۔