زین الدین احمد، -اردو نیوز، کوئٹہ
’زیر تعمیر مکان میں کام کرکے مغرب ہونے کے بعد میں اپنے بھتیجے اور ایک ساتھی مزدورکو موٹر سائیکل پر لے کر جا رہا تھا کہ راستے میں پیٹرول ختم ہو گیا۔ میں نے بھتیجے اور دوسرے ساتھی کو پیدل ہی رہائشگاہ کی طرف جانے کا کہا اور خود موٹر سائیکل واپس زیرِ تعمیر مکان میں کھڑی کرنے چلا گیا۔ واپس آیا تو سب کچھ بدل چکا تھا۔‘
یہ کہنا ہے کہ پنجاب کے ضلع ملتان کے رہائشی عمران کا جن کے ایک بھائی سمیت سات ساتھیوں کو دو روز قبل پنجگور میں نامعلوم افراد نے فائرنگ کرکے قتل کر دیا تاہم عمران کی جان موٹر سائیکل میں پیٹرول ختم ہونے کی وجہ سے بچ گئی۔
عمران کا کہنا ہے کہ ’اس دن موٹر سائیکل میں پٹرول ختم نہ ہوتا تو شاید میں بھی آج زندہ نہ بچ پاتا۔‘
مزید پڑھیں
سنیچر کی شب ایران سے ملحقہ بلوچستان کے ضلع پنجگور کےعلاقے خدابدان میں نامعلوم افراد کے ہاتھوں قتل ہونے والے تمام سات افراد کا تعلق جنوبی پنجاب کے ضلع ملتان کی تحصیل شجاع آباد سے تھا جن کی تدفین گزشتہ روز آبائی علاقے میں کر دی گئیں۔
پولیس نے اس واقعے کا مقدمہ عمران کی مدعیت میں تھانہ سی ٹی ڈی مکران تربت میں نامعلوم افراد کے خلاف انسداد دہشتگردی، قتل اور اقدام قتل کی دفعات کے تحت درج کر لیا ہے۔
عمران نے پولیس کو بتایا کہ وہ گزشتہ دس برس سے پنجگور میں مزدوری کر رہے ہیں۔ یہاں ان کے ہمراہ بھائی ساجد عرف پہلوان اور بھتیجا بلال اور چھ دوسرے رشتہ دار محمد رمضان، فیاض، شفیق، سلیمان، افتخار اور خالد بھی تعمیراتی کام کرتے تھے۔
عمران کے مطابق ’ہم دن کو مختلف جگہوں پر کام کرتے اور رات کو پنجگور کے علاقے خدابدان میں ملا عالم نامی شخص کے خالی مکان میں کرایے پر رہتے تھے۔ ان دنوں پنجگورکے علاقے خدابدان میں ہی ابو بکر نامی شخص کے مکان میں کام کر رہے تھے۔ اس مکان سے کام کی جگہ تک موٹر سائیکل پر آتے جاتے تھے۔‘
عمران کے بقول پیٹرول ختم ہونے کی وجہ سے ابو بکر کے زیر تعمیر مکان میں موٹر سائیکل کھڑی کی۔ ’وہاں موٹر سائیکل کھڑی کر کے مکان کی طرف جا رہا تھا کہ مجھے شدید فائرنگ کی آوازیں آنا شروع ہو گئیں۔ کچھ دیر بعد وہاں پہنچا تو بھائی، بھتیجا اور باقی ساتھی خون میں لت پت تھے۔ چھ لوگ موقع پر ہی جان کی بازی ہار گئے۔ رمضان اور بلال زخمی ہو گئے بعد ازاں رمضان بھی ہسپتال میں دم توڑ گیا۔‘
ڈی ایس پی پنجگور صدورو خان لاشاری کا کہنا ہے کہ ’بلال کو صرف پاؤں میں گولیاں ماری گئیں۔ ان کی حالت خطرے سے باہر ہے، حملہ آوروں نے سمجھا کہ وہ پنجاب سے تعلق رکھنے والے مزدوروں کا ساتھی نہیں ہے اس لیے انہیں چھوڑ دیا۔ حملہ آوروں نے سب کو دیوار کے پاس کھڑا کرکے انہیں اندھا دھند فائرنگ کا نشانہ بنایا۔‘
ابتدائی تحقیقات کے مطابق مقتولین کو سر اور جسم کے مختلف حصوں میں کئی کئی گولیاں ماری گئیں۔ حملہ آوروں نے کلاشنکوف اور نائن ایم ایم پستول کا استعمال کیا۔ جائے وقوعہ سے دونوں ہتھیاروں کے تقریباً 65 خالی خول ملے ہیں۔
رواں سال اب تک 50 سے زائد غیر مقامی مزدوروں اور مسافروں کا قتل
بلوچستان میں پنجاب اور سندھ سمیت دوسرے صوبوں سے تعلق رکھنے والے غیر مقامی مزدوروں اور مسافروں کے قتل کے کئی واقعات پیش آ چکے ہیں۔ رواں ہفتے ہی کوئٹہ میں پنجاب کے علاقے بہاولپور سے تعلق رکھنے والے حجام کی ٹارگٹ کِلنگ کی گئی۔
پولیس اور لیویز کے اعداد و شمار کے مطابق صرف اس سال اب تک بلوچستان میں دوسرے صوبوں سے تعلق رکھنے والے 50 سے زائد افراد کو شناخت کے بعد قتل کیا جا چکا ہے۔
26 اگست کی شب کو پنجاب سے ملحقہ بلوچستان کے ضلع موسیٰ خیل میں عسکریت پسندوں نے 23 افراد کو مسافر بسوں سے اتار کر قتل کر دیا تھا، ان میں کم از کم 20 افراد کا تعلق پنجاب سے تھا۔ اسی طرح رواں سال مئی میں گوادر کے علاقے سربندن میں پنجاب کے ضلع خانیوال سے تعلق رکھنے والے سات افراد کی ٹارگٹ کلنگ کی گئی۔
28 اپریل کو ضلع کیچ میں تعمیراتی کام کرنے والے دو مزدوروں کو قتل کیا گیا۔ اپریل ہی میں کوئٹہ سے ایران جانے والے پنجاب کے رہائشی 9 مسافروں کو شناخت کرکے بس سے اتار کر قتل کیا گیا۔
اپریل 2015 میں تربت کے علاقے گوکدان میں مزدوروں کے ایک کیمپ پر نامعلوم افراد نے حملہ کرکے 20 مزدوروں کو قتل کر دیا تھا۔
اسی طرح اس ضلع میں جولائی 2012 میں 18 افراد اور نومبر 2017 میں یورپ جانے کے خواہشمند پنجاب کے 15 رہائشیوں کو پاکستان ایران سرحد کے قریب قتل کر دیا گیا تھا۔
ایسے زیادہ تر واقعات کی ذمہ داری صوبے میں سرگرم بلوچ مسلح تنظیموں بلوچ لبریشن آرمی اور بلوچ لبریشن فرنٹ قبول کرتی رہی ہے تاہم پنجگور کے واقعے کی ذمہ داری اب تک کسی تنظیم نے قبول نہیں کی۔
’پنجگور واقعہ ایس او پیز پر عمل نہ کرنے کی وجہ سے پیش آیا‘
بلوچستان میں پنجاب، سندھ اور خیبر پختونخوا سے تعلق رکھنے والے مزدوروں کے قتل کے مسلسل واقعات کے بعد حکومت نے پولیس، لیویز اور ضلعی انتظامیہ کو دوسرے صوبوں سے تعلق رکھنے والے مزدوروں اور مسافروں کی سکیورٹی سخت کرنے کی ہدایات جاری کی تھیں۔
نوشکی واقعے کے بعد مسافر بسوں میں سکیورٹی اہلکاروں کی تعیناتی، چیک پوسٹوں کی تعداد اور پولیس اور لیویز سمیت سکیورٹی اداروں کے گشت میں اضافے کے ساتھ ساتھ حساس اضلاع میں بغیر اجازت غیر مقامی افراد کے سفر پر پابندی عائد کر دی گئی تھی جبکہ دوسرے صوبوں سے تعلق رکھنے والے مزدوروں کی رجسٹریشن کو لازمی قرار دے دیا گیا تھا۔
تاہم حکام کا کہنا ہے کہ پنجگور میں قتل ہونے والے مزدوروں کی موجودگی سے متعلق حکومت لاعلم تھی۔ اس بات کا اعتراف وزیراعلٰی بلوچستان میر سرفراز بگٹی نے پیر کو کوئٹہ میں ایک پریس کانفرنس میں بھی کیا۔
پنجگور کی ضلعی انتظامیہ کے ایک افسر نے نام ظاہر نہ کرنے کی شرط پر اردو نیوز کو بتایا کہ چند ماہ قبل مزدوروں کی سکیورٹی سے متعلق ایک اجلاس کی صدارت بھی کی تھی جس میں ضلع میں کام کرنے والے تمام غیر مقامی مزدوروں کی رجسٹریشن اور انہیں سکیورٹی کی فراہمی سے متعلق غور کیا گیا۔
اس اجلاس کے بعد تمام ٹھیکیداروں کو پنجاب، سندھ اور دوسرے صوبوں سے تعلق رکھنے والے مزدوروں کی رجسٹریشن کرانے کی ہدایات جاری کی گئیں۔ ضلعی انتظامیہ کے افسر کے مطابق سرکاری تعمیراتی کام کرنے والے ٹھیکیداروں نے تو مزدوروں کی رجسٹریشن کرالی تھی تاہم نجی گھروں میں کام کرنے والے بیشتر مزدوروں کی رجسٹریشن نہیں کرائی گئی۔
پنجگور پولیس کے ڈی ایس پی صدورو خان لاشاری کا کہنا ہے کہ بعض لوگ پولیس کے ساتھ تعاون نہیں کرتے اور اپنے پاس کام کرنے والے مزدوروں کی رجسٹریشن نہیں کراتے۔ نشانہ بننے والے مزدوروں میں بھی نصف نے رجسٹریشن نہیں کرائی تھی۔ جنہوں نے رجسٹریشن کرائی تھی انہوں نے بھی اپنی رہائش اور کام کی جگہ دوسری بتائی تھی۔
ان کا کہنا تھا کہ ’ہمارے پاس جو مزدور رجسٹریشن کراتے ہیں، اگر ان کی تعداد 10 سے زائد ہو تو ہم حفاظت کے لیے پولیس اہلکار فراہم کرتے ہیں لیکن اگر تعداد کم ہو تو ہم پولیس اہلکار تعینات کرنے کی بجائے اس علاقے میں گشت بڑھا دیتے ہیں۔ پولیس اہلکار ہر آدھے اور ایک گھنٹے بعد وہاں گشت کرتے ہیں۔
ان کا کہنا تھا کہ ’ہم نے پہلے بھی مزدوروں کو ہدایات جاری کی تھیں کہ وہ محتاط رہیں، غیر ضروری طور پر باہر نہ نکلیں اور اپنی پرائیوٹ سکیورٹی بھی رکھیں۔‘
گزشتہ سال اکتوبر میں کیچ کے ضلعی ہیڈکوارٹرز تربت میں چھ مزدوروں کے قتل کے بعد حکومت نے غیر مقامی مزدوروں کو تھانوں میں رہائش دینے کی ہدایت کی تھی تاہم اس کے چند دن بعد ہی تربت میں مسلح افراد نے تھانے پر حملہ کرکے مزید چار مزدوروں اور ایک پولیس اہلکار کو قتل کردیا تھا۔
ڈی ایس پی پنجگور کے مطابق ’ہمارے پاس نفری کی کمی رہتی ہے، تھانے میں بھی مزدوروں کو رہائش دینے کے لیے ہمارے پاس کوئی بندوبست نہیں اس لیے ہماری کوشش ہوتی ہے کہ مزدور جن علاقوں میں کام کرتے ہیں وہاں گشت بڑھائیں۔ رجسٹرڈ مزدوروں کو گشت پر معمور اہلکاروں کا موبائل نمبر بھی فراہم کیا جاتا ہے تاکہ وہ کسی مشکوک سرگرمی کی فوری طور پر پولیس کو اطلاع دے سکیں۔‘
ان کا کہنا تھا کہ ’نشانہ بننے والے مزدور ملا عالم نامی مقامی ٹھیکیدار کے ایک خالی گھر میں رہتے تھے جس میں ایک دو کمرے تھے اور اس کی چار دیواری بھی تھی۔ ملا عالم مزدوروں کو پنجاب سے بلاکر ان سے پنجگور میں کام کراتا ہے۔ رجسٹریشن نہ کرانے پر ملا عالم کے خلاف قانونی کارروائی کی جائے گی۔‘
