مکہ میں پیر کو دوسرے دن بھی بارش، مسجد الحرام میں زائرین کی دعائیں

سعودی عرب میں بارش کا سلسلہ جاری ہے۔  مکہ مکرمہ میں پیر 28 اکتوبر کو بھی گرج چمک کے ساتھ  بارش کی اطلاعات ہیں۔ 

الاخباریہ چینل کے مطابق مسجد الحرام میں زائرین نے بارش کے دوران طواف کرتے رہے۔

 وڈیو کلپس میں زائرین کو روحانی ماحول میں مسجد الحرام کے صحن اور مطاف میں دعائیں مانگتے دکھایا گیا ہے۔

مکہ مکرمہ کے دیگر علاقوں میں بارش سے سڑکیں زیر آب آگئیں۔ مدینہ منورہ میں بھی بارش کی اطلاعات ہیں، بارش کا سلسلہ رات تک جاری رہے گا۔

پچھلے چوبیس گھنٹے کے دوران باحہ ریجن کے علاقے نخال، القری میں سب سے زیادہ 17.3 ملی میٹر بارش ریکارڈ کی گئی ہے۔

مکہ ریجن کے علاقے قیا، طائف میں 16.9 جبکہ السدیرہ طائف میں 14.0 ملی میٹر بارش ریکارڈ کی گئی۔

واضح رہے حرمین شریفین انتظامیہ نے مسجد الحرام کی خدمت پر مامور متعدد سرکاری اداروں کے تعاون سے مسجد الحرام میں بارش  کے مسائل سے نمٹنے کے لیے ہنگامی سکیموں پر عمل درآمد شروع کررکھا ہے۔

حرمین شریفین انتظامیہ کی کوشش ہے کہ عبادت کے دوران زائرین کی سلامتی کو یقینی بنایا جائے۔

بارش کے دوران مطاف، نماز کے مقامات، داخلی راستوں پر فوری طور پر پانی کی نکاسی اور فرش خشک کیے جانے کو یقینی بنایا جارہا ہے۔