سعودی عرب میں پرفارم کرنے سے انکار کیا نہ ہی ایسا کوئی بیان دیا: گلوکار عاطف اسلم

پاکستان کے نامور گلوکار عاطف اسلم نے ان خبروں کی تردید کی ہے کہ انہوں نے سعودی عرب میں پرفارم کرنے سے انکار کیا ہے۔

صحافی ملیحہ رحمان کے ساتھ گفتگو میں عاطف اسلم کا کہنا تھا کہ ’میں نے سعودی عرب میں پرفارمنس سے انکار نہیں کیا اور نہ ہی اس حوالے سے کوئی بیان دیا ہے۔‘

خیال رہے چند روز سے سوشل میڈیا پر خبر گردش کر رہی تھی کہ عاطف اسلم نے مقامات مقدسہ کے سبب سعودی عرب میں پرفارم کرنے سے انکار کردیا ہے۔

بہت سارے سوشل میڈیا ہینڈلز اور پیجز پر عاطف اسلم کے اس مبینہ بیان کو شیئر کیا گیا تھا۔

تاہم اب عاطف اسلم نے واضح کیا ہے کہ انہوں نے ایسا کوئی بیان ہی نہیں دیا، اور نہ سعودی عرب میں پرفارمنس سے انکاری کیاہے، ان کے نام سے پھیلایا گیا بیان غلط ہے۔

عاطف اسلم نے کہا کہ انہوں نے ایسا کوئی بیان دیا ہی نہیں۔

’شوبز شخصیات سمیت میڈیا والوں کو ایسا کوئی بیان شیئر اور پھیلانے سے پہلے اس کی تصدیق کرنی چاہیے، انہیں ایسے بیانات کو پھیلانے سے گریز کرنا چاہیے۔‘

گلوکار کا مزید کہنا تھا کہ یہ مضحکہ خیز بیان ہے، انہوں نے ایسا کوئی بیان نہیں دیا کیوں کہ وہ ماضی میں سعودی عرب میں پرفارم کر چکے ہیں۔

عاطف اسلم کے مطابق وہ ماضی میں سعودی عرب کے دارالحکومت ریاض میں پرفارم کر چکے ہیں۔