جڑی ہوئی پاکستانی بچیاں فاطمہ اور مشاعل سعودی قیادت کی شکر گزار

پاکستانی جڑی ہوئی بچیوں فاطمہ اور مشاعل کے والد نے آپریشن کےلیے سعودی قیادت کا شکریہ ادا کیا ہے۔

انہوں نے کہا کہ سعودی فرمانروا شاہ سلمان اور ولی عہد نے میری بچیوں کو جو دیا ہے اس پر شکر گزار ہوں۔ اس پر بہت خوش ہوں کہ اب دونوں بچیاں معمول کی زندگی گزار رہی ہیں۔

الاخباریہ کے مطابق پاکستانی بچیوں فاطمہ اور مشاعل نے بھی سعودی قیادت شاہ سلمان اور ولی عہد کا شکریہ ادا کیا۔

انہوں نے شاہ سلمان مرکز کے سربراہ ڈاکٹر الربیعہ اور ان کی ٹیم کا بھی شکریہ ادا کیا۔

سوات سے تعلق رکھنے والی ان بچیوں کو ایک دوسرے سے علیحدہ کرنے کے لیے 2016 میں آپریشن ہوا تھا۔ دونوں بچیاں پیٹ اور سینے سے جڑی ہوئی تھیں۔

 سعودی عرب میں اب تک 22 ملکوں کے ایک دوسرے سے جڑے ہوئے 118 بچوں کے کامیاب آپریشن  ہو چکے ہیں۔ 

تین دہائی قبل سعودی عرب میں اس نوعیت کا آپریشن کرنا انتہائی اہم پیش رفت اور چیلنج تھا۔ 

اس وقت کی رپورٹوں کے مطابق آپریشن میں کامیابی کا تناسب 55 سے 60 فیصد تھا تاہم پہلا کامیاب آپریشن سیامی بچوں کے آپریشن کے میدان میں ایک ٹرننگ پوائنٹ ثابت ہوا۔