سعودی عرب میں مشترکہ فضائی مشق ’طویق 4‘ کا پہلا مرحلہ مکمل

سعودی وزارت دفاع کا کہنا ہے کہ’ پرنس سلطان ایئربیس پر 8 ممالک کی مشترکہ فضائی مشق ’طویق 4‘ کا پہلا مرحلہ مکمل ہوگیا۔‘

 ایکس اکاونٹ پر بیان کے مطابق پہلے مرحلے میں ٹیکنیکل ایئر ڈراپ آپریشنز کیے گئے جس کا مقصد جدید جنگی ماحول میں تجربات اور مہارتوں کا تبادلہ کرنا ہے۔

مشترکہ فضائی مشقوں میں سعودی عرب، امارات، عمان، قطر، اردن، مراکش، برطانیہ، امریکہ اور یونان کی ایئرفورس کے دستے شرکت کررہے ہیں جبکہ مصر اور بحرین کے مشقوں کی نگرانی کریں گے۔ یہ مشقیں دو ہفتے جاری رہیں گی۔

فضائی مشق کے ڈائریکٹر کرنل پائلٹ محمد عبداللہ الخنفور کا کہنا ہے’طویق 4 ‘ مشقوں کا مقصد ٹیکنیکل پروجیکشن کے شعبے میں تعاون اور تجربات کا تبادلہ کرنا، فضائی، تیکنیکی اور معاون عملے کی تیاری کی سطح اور ان کی جنگی کارکردگی کو بڑھانا، انہیں ٹیکنیکل پروجیکشن اور لینڈنگ کے شعبے میں ہر طرح کے ماحول میں ٹاسک پورے کرنے کا اہل بنانا ہے۔

مشقوں کے آغاز پر فضائی مشق کے ڈائریکٹر نے بتایا تھا کہ’ مشقوں میں شامل دستے مختلف بلندیوں سے اترنے اور جنگی حکمت عملی کے تحت تکنیکی طریقوں کو آزمائیں گے۔‘

علاوہ ازیں سرچ اینڈ ریسکیو آپریشن بھی مشقوں کا حصہ ہوں گے۔