پاکستان بحریہ کے سربراہ کی بحرین کے بادشاہ سے ملاقات

پاکستان بحریہ کے سربراہ ایڈمرل نوید اشرف نے بحرین کا دورہ کیا ہے جہاں انہوں نے اعلٰی سول اور فوجی قیادت سے ملاقاتیں کی ہیں۔

پاکستان فوج کے شعبہ تعلقات عامہ (آئی ایس پی آر) کی جانب سے اتوار کو جاری ہونے والے بیان کے مطابق بحریہ کے سربراہ نے بحرین کے بادشاہ حماد بن عیسی الخلیفہ سے تفصیلی ملاقات کی ہے۔ اس ملاقات میں دفاعی تعاون کو مضبوط بنانے اور دونوں ممالک کے مابین تاریخی تعلقات کو مستحکم کرنے پر تبادلہ خیال کیا گیا۔

ایڈمرل نوید اشرف کی بحرین کے ولی عہد، وزیراعظم اور ڈپٹی سپریم کمانڈر بحرین ڈیفنس فورسز سلطان بن حماد الخلیفہ سے الگ ملاقات کے دوران باہمی دفاعی تعلقات پر تفصیلی مشاورت ہوئی۔

انہوں نے کمانڈر بحرین ڈیفنس فورسز فیلڈ مارشل شیخ خلیفہ بن احمد الخلیفہ، کمانڈر بحرین نیشنل گارڑ جنرل شیخ محمد بن عیسی بن سلمان اور کمانڈر رائل بحرین نیول فورس ریئر ایڈمرل احمد محمد ابراہیم البن علی سے بھی تفصیلی ملاقاتیں کی ہیں۔

بیان کے مطابق ملاقاتوں میں باہمی دلچسپی کے سکیورٹی امور اور دو طرفہ دفاعی تعاون کو مزید بڑھانے پر تبادلہ خیال کیا گیا۔

پاکستان بحریہ کے سربراہ ایڈمرل نوید اشرف نے رائل بحرین ڈیفنس فورس کے جنگی جہاز منامہ اور رائل کمانڈ اینڈ سٹاف کالج کا بھی دورہ کیا اور افسران کو خطے کی سکیورٹی صورت حال پر لیکچر دیا۔

آئی ایس پی آر کے مطابق بحریہ کے سربراہ کا دورہ دونوں ممالک کے تعلقات کو مزید فروغ اور وسعت دے گا۔