سعودی عرب میں سنیپ چیٹ کے ماہانہ صارفین 25 ملین سے زیادہ

سعودی عرب میں سوشل میڈیا پلیٹ فارم سنیپ چیٹ کے صارفین میں غیرمعمولی اضافہ ریکارڈ کیا گیا ہے۔

اندازے کے مطابق ماہانہ ایکٹیو صارفین کی تعداد 25 ملین سے تجاوز کرچکی ہے۔

سبق نیوز کے مطابق مملکت میں سوشل میڈیا پلیٹ فارمز میں سب سے زیادہ استعمال ہونے والی ایپ سنیپ چیٹ ہے جس کے ذریعے سعودی شہری سرکاری، سماجی و دیگر تقریبات کی وڈیو یا تصاویر شیئر کرتے ہیں۔

سعودی عرب میں سنیپ چیٹ کے ڈائریکٹر جنرل عبداللہ الحمادی کا کہنا تھا’ مملکت میں ایپ نے غیرمعمولی مقبولیت حاصل کی ہے جو اس بات کی عکاس ہے کہ سنیپ چیٹ سعودی معاشرے میں اہم کردار ادا کررہا ہے جس کے ذریعے لوگ اپنے بہترین لمحات شیئر کرتے ہیں۔ مملکت کے قومی تہواروں کے علاوہ سماجی تقریبات کے حوالے سے بھی جڑے رہتے ہیں۔‘

سنیپ چیٹ پر بیشتر سعودی شہری سیاحتی مقامات کے پرلطف نظاروں اور تفریحی سرگرمیوں کی اطلاع فراہم کرتے ہیں جس کے ذریعے دوسروں کو بھی ان سرگرمیوں کے بارے میں اہم معلومات میسر آتی ہیں۔

واضح رہے سنیپ چیٹ نے ریاض کے علاقے الدرعیہ میں اپنا ریجنل آفس قائم کیا ہے۔