پاکستان کے کراٹے کھلاڑی شاہزیب رند کا فلوریڈا میں اپنے لائٹ ویٹ ٹائٹل کا کامیاب دفاع

پاکستانی کراٹے فائٹر شاہزیب رند نے اپنے سب سے مشکل حریف اور تین بار کے عالمی چیمپئن ایڈگر سکرائیور کو شکست دے کر لائٹ ویٹ چیمپئین ہونے کے اعزاز کا کامیاب دفاع کیا ہے۔

پاکستان مکسڈ مارشل آرٹس فیڈریشن کے مطابق امریکی ریاست فلوریڈا کے شہر میامی میں منعقدہ کراٹے کمبیٹ (کے سی) 52 میں شاہزیب رند نے اپنے حریف کو صفر کے مقابلے میں سات سے شکست دی۔

کے سی 52 فُل کنٹیکٹ پروفیشنل کراٹے لیگ ہے جو گلوبل کراٹے ایم ایم اے سیریز کا حصہ ہے جس میں سکلڈ فائٹرز بھرپور مقابلے کرتے دکھائی دیتے ہیں۔

بلوچستان سے تعلق رکھنے والے شاہزیب رند نے سنہ 2011 میں پہلا مقابلہ جیتا تھا جو صوبائی سطح کا ٹورنامنٹ تھا۔ انہوں نے قومی سطح کا ٹائٹل سنہ 2019 میں خیبر پختونخوا میں منعقد ہونے والے نیشنل گیمز میں جیتا تھا۔

گزشتہ اڑھائی برس کے کراٹے کمبیٹ کیریئر میں شاہزیب رند ناقابل شکست رہے اور اس دوران انہوں نے شمالی امریکہ میں پیرو، وینزویلا، برازیل، فرانس اور اںڈیا کے فائٹرز کے مدمقابل اکھاڑے میں اترے۔

پاکستان مکسڈ مارشل آرٹس فیڈریشن نے کہا ہے کہ ’مہارت اور عزم کے شاندار مظاہرے میں شاہزیب رند نے ایڈگرس سکرائیورز کے مدمقابل سخت جدوجہد کے بعد فتح کے ساتھ دپنا دوسرا چیمپئن شپ ٹائٹل اپنے نام کیا ہے۔‘

فیڈریشن کے مطابق ’میامی میں جمعے کو زبردست مقابلہ ہوا جہاں شاہزیب رند نے اپنی توانائی سے سامعین کو مسحور کیا اور مسابقتی جذبے کا بہترین مظاہرہ کیا۔‘

بیان میں کہا گیا ہے کہ رند نے ’غیر معمولی‘ کارکردگی دکھائی جس نے اپنے مداحوں کو پورے میچ میں پرجوش رکھا۔ فیڈریشن نے مزید کہا کہ ان کی ’لگن، انتھک ٹریننگ اور قابل ذکر مہارت‘ نے ٹائٹل کے دعویداروں میں سے ایک کے طور پر ان کی پوزیشن مستحکم کی۔

مکسڈ مارشل آرٹس فیڈریشن نے کہا کہ ’رند کی فتح ثابت قدمی اور محنت کے صلے کا ثبوت ہے۔‘

نیویارک میں پاکستانی سفارت خانے نے شاہزیب رند کو اپنے اعزاز کا دفاع کرنے پر مبارکباد دی۔

سفارت خانے نے ایکس پر پوسٹ کیا کہ ’ایم ایم اے فائٹر شاہزیب رند کو دل کی گہرائیوں سے مبارکباد، بلوچستان سے تعلق رکھنے والے پاکستان کے بہادر فرزند کو امریکی ریاست فلوریڈا کے شہر میامی میں اپنے لائٹ ویٹ ٹائٹل کا دفاع کرنے اور دوسری بار عالمی چیمپئن بننے پر دلی مبارکباد پیش کرتے ہیں۔‘

شاہزیب رند نے اپنی جیت کو پاکستان کے عوام کے نام کیا ہے۔